Таңһчин эмнлһн даавртаһар көдлв

20-03-2021, 14:56 | Таңһчин зәңгс » Зіњг

Эн долан хонгт П.Жемчуевин нертә таңһчин эмнлһнд болсн медицинск хүүвин сүүрт 2020-ч җилд кеҗ-күцәсн көдлмшин аш диглгдәд, эн җилин зура батлгдв. Тооцана селвлцәнд Хальмг Таңһчин Толһачин һардврин, Росздравнадзорин, Роспотребнадзорин региональн заллтсин, ТФОМС-ин болн таңһчин эрүл-менд харлһна министерствин элчнр орлцв. Таңһчин эмнлһнә ах эмч Бадм-Һәрән Очр давсн җилә үүлдвриг ашлҗ, ямаран чинртә төрмүд хаһлгдсна тускар тодрхаһар келҗ өгв.

Очр Владимировичин темдглсәр, давсн җилин хөн сард эмнлһнә улд коронавирусн гемәр гемтсн улст дөң күргхин төлә госпиталь бүрдәгдҗ, кесг зу һар күүнә әм аврҗ авгдв. Таңһчин һоллгч эмнлһнә көдләчнр цуг арһ-чидлән агсҗ, эн җилин туршарт коронавирусн гемтә улст дөңгән күргҗ, шин таалд үүлддгиг дасч эн хальдврта гемәс хөрлһнә туст байн дамшлт хоршаҗ авв. Түрүләд энд 96 орм бүрдәгдсн билә, хөөннь теднә то 324 күртл икдүлгдв. Намрар хулһн сард Целинн района Деед Яшкулин санаторн сурһулин улд немр 100 орм бүрдәҗ, гемтә улс тенд цааранднь эмнлһ авхин төлә цуг таал тогтагдв, эрүл-менд харлһна көдләчнр реабилитацин керг-үүлдврмүд давулдг болв. Ут тоодан таңһчин эмнлһнә улд үүлдҗәдг госпитальд 13851 күн эмнлһ авв.
– Давсн җил цуг мадна төлә күнд-күчр болв. Бидн олн зүсн гемтә улсиг эмнлһнд авдган уурлавидн, өдрәр үүлддг стационар болн поликлиник көдлдго болв. Бидн үүлдврән цагин некврлә ирлцүлҗ бүрдәх зөвтә болвидн. Тер бийнь эпидемиологическ бәәдл нәрн болв чигн бидн 4000 месллһ, тер тоод өөдән чинртә технологическ месллһ кеввидн. Тиигәд, саата күүкд улст цаһан төр болхд бидн дөңгән күргвидн. Пандемийин таалд «Эрүл-менд харлһн» гидг келн-улсин төсвин болн «Хальмг Таңһчд эрүл-менд харлһна делгрлт» гидг шаңһа көтлврин керг-үүлдврмүд күцәлһнә көдлмш цааранднь давулгдв. Судцна гемтә улст дөң күрглһнә көтлврин халхар мана эмнлһнд 56 кергсл йилһгдв. Гүлгн гемтә улст амбулаторн дөң күрглһнә төв урдк кевәрн үүлдҗ, давсн җилд 1361 күүг хәләв, тер тоод 473 селән һазрас ирсн күүнд дөң болв. Төвин эмчнр кесн шинҗллтсин ашт 51 күүнд гүлгн гем илдкгдв, – гиҗ Очр Владимирович келв.
Эмнлһнә улд үүлдҗәдг госпитальд эмчнр, дунд болн баһ медицинск көдләчнр завср угаһар көдлҗ, көдлмшән ик даавртаһар болн үнн-чик седклтәһәр күцәсиг селвлцәнд онц темдглв. Эрүл-менд харлһна көдләчнр удан цагтан өөрхн элгн-садан үзлго госпитальд көдлв, зәрмснь эн хальдврта гемәр бийснь бас гемтв. Тер бийнь эдн гемтә улсин әм аврхин төлә гүҗрҗ көдлв. Ах эмчин келсәр, көдлмш эпидемиологическ күнд таалд күцәгдв. Болв әңг болһн көдлмшән дигтә-даратаһар бүрдәҗ чадв. Эндр эмнлһнд 1210 күн көдлнә, теднәснь 225 эмч болн 475 дунд медицинск көдләч болна. Эмнлһнә һардвр кадрмудар тетклһнә төриг хаһлҗ, 34 эмчиг болн 65 дунд медицинск көдләчиг көдлмшт авв.
- Мана эмнлһнд үүлдҗәдг госпитальд болн эрүл-менд харлһна цуг көдләчнрт таңһчин һардвр болн эгл улс килмҗән тусхаҗ, дөң-тусан күргҗ, буйнч секдлин керг-үүлдврмүд бүрдәҗ ик омг өгв. Коронавирусн гемтә улст дөң күргсн цагт әәмшгтә таалд көдлсн эрүл-менд харлһна көдләчнриг урмдулхин төлә федеральн болн региональн демин мөңгн өггдв. Тиигәд, Хальмг Таңһчин Залврин тогтаврас иштә госпитальд көдлҗәх эрүл-менд харлһна көдләчнрт демин мөңг өглһнд таңһчин шаңһас 266,1 сай арслң йилһгдв. Тер тогтаврар эмчнрт хойр долан хонгт госпитальд көдлсн төләднь 75 миңһн арслң, дунд медицинск көдләчнрт – 45 миңһн арслң, баһ медицинск көдләчнрт 35 миңһн арслң өггдв. Келхд, хам-хоша бәәдг зәрм регионмудт эмчнрт зуг 20 миңһн арслң өгнә. Хальмг Таңһчин Толһачин зәрлгәс иштә медсестран нарт-делкән Өдр угтҗ күн болһнд 3000 арслңга мөрә өггдв. Эн кергт 2 сай шаху арслң таңһчин шаңһас бас йилһгдв. Тер мет таңһчин шаңһас йилһгдсн 5 сай арслңгар госпиталин үүлдврт кергтә кесг тоот, саглуллһна эв-арһс, рецеркулятормуд хулдҗ авгдв. Госпитальд көдлсн көдләчнрин төлә гиичлүрт хорас нәәмәдлҗ авгдв, тедниг халун хотар теткв, нань чигн төрмүд хаһлгдв, – гиҗ ах эмч темдглв.
Эн өдрмүдт Деед Яшкульд секгдсн госпиталь үүлдврән зогсахмн. Таңһчин эмнлһнд гемтә улст урдк кевәрн медицинск дөң күргҗәнә. Эмнлһнә ах эмчин келсәр, энд таңһчин әмтнд өөдән болн сән чинртә дөң күргхин төлә шин кергсл эдлврт орулгдхмн.
ДАВАН Наталья

Видео