Сансрт күрсн Моңһлын үрн Ж. Гуррагча

25-03-2021, 17:14 | Таңһчин зәңгс » Зіњг

40 җил хооран сансрт күрсн, «Салют-6» орбитальн станцд көдлсн моңһл космонавт Ж. Гуррагча Александр Невскийин орденәр ачлгдв. Күндтә ачлвриг Әрәсән Президент В. Путинә батлсн зәрлгәр бәрүлҗ өгв. «Әрәсән Федерацин болн Моңһлын цуг халхин стратегическ нөкцлтин делгрлтд ач-тусан күргсн төләдән «Моңһл-Әрәсә» иньгллтин бүрдәцин президент Жугдэрдэмидийн Гуррагча Александр Невскийин орденәр ачлгдҗана» – гиҗ ачлврин цааснд бичгдҗәнә.


Келхәс, Александр Невскийин орден Әрәсән Федерацин өөдән ачлврин негнь болдмн. Әрәсән иргнмүдәс нань эн орденәр Әрәсәлә нөкцлтиг батруллһнд, орн-нутгин социальн-экономическ делгрлтд ик тәвцән орулсн һазадын орна политическ болн олна үүлдәчнр, керг-үүлин халхар үүлдҗәдг элчнр чигн ачлгдна.
Әрәсән болн Моңһлын хоорндк нөкцлт батрлһнд Ж. Гуррагча орулҗах ик тәвцнь иигҗ өөдән үнлгдв. 40 җил хооран сансрт түрүн болҗ һарад, «Салют-6» орбитальн станцд Әрәсән космонавтнрла көдлсн цагасн авн цуг үүлдврнь, тер дотр «Моңһл - Әрәсә» гидг иньгллтин бүрдәц толһалҗах үүлдврнь хойр орн-нутгин хоорндк залһлдаг цуг халхарнь батллһнд залгдсн бәәнә.
Сансрт күрсн космонавтан Моңһлд әмтн цань уга күндлнә. 1981-ч җилин моһа сарин 22-ас авн 30 күртл «Салют-6» орбитальн станцд көдлсн кемднь нерәдҗ Моңһлд җил болһн байрин керг-үүлдврмүд бүрдәнә.
Эгл моңһл малчин бүлд өсч-боссн көвүн самолетмуд заллһна школ төгсәһәд, теңгрт дуран өгсмн. Жуковскийин нертә авиационн академь төгсәһәд, Гуррагча космонавтнрин отрядт шүүҗ авгдсмн. Энд белдврин цуг сурһулиг дасад, дамшлт авад, «Союз» космическ керм деер нисҗ һарад, «Салют-6» орбитальн станцд көдлсмн.
Сансрин аһуһас төрскн һазран үзсн Гуррагча көк теңгрин кесг саяд дууна һазрас хәләхлә, Моңһл нутгнь ямаран сәәхн бәәсиг седклин ик үүмәтәһәр тодлҗ келнә. Улан Баатр, Дархан, Эрдэнэт, олн селәд сөөһин харңһуг һатлҗ, холд йовх үрндән олн шамарн докъя өгсн болҗ медгддмн. Төрскн нутгин теегиг болн уулмудыг, тиньгр һазриг болн ө-шуһу модта сәәхн ормсиг тодлулҗ, сөөни һалмударн омг өгсн болҗ, зүркинь бульглулҗасн, дүүҗң болсн һазрин ке-сәәхниг эн төрүц мартхш.
2000-2004-ч җилмүдт Ж. Гуррагча Моңһлын харслтын министрин үүлд көдлсмн. Сансрт күрсн ик хөвтә Моңһлын үрн Жугдэрдэмидийн Гуррагча орн-нутгин нериг өөдән бәрҗ йовна.

Видео