Селәдт эмчнрин офисмуд тосхгдх

27-03-2021, 17:24 | Таңһчин зәңгс » Эрўл-менд харлһн

Шидр Хальмг Таңһчин правительствин Ахлачин негдгч дарук – финансин министр Шурһчин Очрин һардврт болсн селвлцәнд «Хальмг Таңһчин түрүн медицинск дөң күрглһнә халхиг ясруллһн» гидг региональн көтлврин медлд райодт олн дамшлтын эмчнрин офисмуд (ВОП) тосхлһна төр хәләгдв. Селвлцәнд таңһчин эрүл-менд харлһна, финансин, һазрин болн өлг-эдин хәрлцәнә министерствсин болн ФОМС-ин территориальн әңгин һардачнр орлцв.

Эн җил мана таңһчд олн дамшлтын эмчнрин 9 офис тосхгдхмн. Тиигәд, Целинн района Вознесеновка, Көтчнрә района Ергенинск, Баһ Дөрвдә Тундутово, Октябрьск района Восход, Приютна района Песчаный болн Первомайский, Хар Һазра Адык, Яшкулин Привольный болн Яшалтан района Эсто-Алтай селәдт ВОП-муд тосхгдхмн гиҗ зуралгдҗана. Эн кергт 163 сай арслң йилһгдхмн. Тер мет селвлцәнд эрк биш медицинск даатхлһна системд көдлдг медицинск шаңһа бүрдәцсиг мөңгәр тетклһнә төр бас босхгдв.
БАТАН Сәәхлә