Тәрлһ авсн улсин то икдҗәнә

15-04-2021, 15:53 | Таңһчин зәңгс » Зіњг

Хальмг Таңһчд коронавирусн гемәс саглуллһна тәрлһ келһнә керг-үүлдвр дигтә-даратаһар болн күцәмҗтәһәр давҗахас иштә федеральн төв немр вакцин йилһв. Энүнә тускар Хальмг Таңһчин Толһач Хаска Бату зәңглв. Тиигәд, мана таңһчд ут тоодан 22305 күн тәрлһ авсн бәәнә. Таңһчин эмнлһнә бүрдәцсин улд үүлдҗәдг 14 пункт тәрлһ авхин төлә таал тогтагдсн деер һурвн мобильн комплекс секгдв. Тиигәд Элстд тиим мобильн комплексмүд һурвн ормд зогсҗана, бәәрн улс тиим таал тогтасиг өөдәнәр үнлҗ тәрлһ авлһнд шунмһаһар орлцҗана.
Таңһчин эрүл-менд харлһна министерствин то-дигәр сүл хонгт дәкәд 19 күүнд эн хальдврта гем илдкгдв. Пандемий эклсн цагас авн мана таңһчд ут тоодан 20244 күн COVID-19 гемтв. Теднәснь 19432 күн эмнлһ авсна хөөн эдгв. Эндр таңһчин госпитальмудт 221 күн эмнлһ авчана. Күнд кевәр гемнь давҗах 9 күүнәс дөрвнь ИВЛ-аппаратд бәәнә.
Коронавирусн гемәс эдгсн улс дунд медәтнр Таисия Михайловна Никитенко болн Манҗ Кикеевич Сумьянов бәәхнь эднә элгн-саднд болн эрүл-менд харлһна көдләчнрт ик байр-бахмҗ үүдәв. Эдн госпитальд эмнлһ авад, ода гертән бәәнә гиҗ эдниг хәләсн эмчнр Васлян Намҗл болн Болдра Ирина келв. Моһа сард 4-ч тойгта госпитальд дал һарсн 7 күн, най һарсн 12 медәт болн йир һарсн 3 көгшә эмнлһ авад эн хальдврта гем диилҗ чадв.
Эн өдрмүдт таңһчд коронавирусн гемәс саглуллһна тәрлһ келһн цааранднь күцәгдҗәнә. Намрар тәрлһ авх гиҗ бичгдсн улсиг поликлиникд дуудҗ ода тәрлһ кеҗәнә. Немр вакцин йилһснә ашт чеерүдт бәәсн улст тәрлһ келһнә төр хаһлгдв.
Мана зәңгч

Видео