Хальмг бииhǝрн олыг байрлулв

15-04-2021, 16:17 | Таңһчин зәңгс » Зіњг

Давсн долан хонгт Элстд Олимпийск чемпион, Əрәсән спортын ачта мастер Макаренко Алинан мɵрә авхин тɵлә художественн гимнастикин Цугәрәсән марһан давулгдв. Мана орн-нутгин кесг регионас марһанд орлцхар олн элчнр ирсн билә.
Элст балhсна олн салврта гимназин 4-ч классин сурhульч арвта Муучкан Ангелина сǝǝхн хальмг бииhǝр марhаг секв. Ангелина тавн җилдǝн РКСШОР-д гимнастик дасчана. Гимнастикǝр дамҗад хальмг би тǝвлhнд күүкнǝ дамшач Сысуева Иринан күчн, гиҗ Ангелинан экнь Муучкан Наталья келв. Урдаснь дамшачнь хальмг бииhин эв-арhс хǝлǝhǝд, шинҗлǝд, хɵɵннь гимнастикт орулсмн. Арвн ɵдрмүдин туршарт Ирина Ивановна Ангелинаг хальмг биид дасхсмн. Түрүн болҗ энүгǝн Черкесск балhснд болсн марhанд үзүлсмн. Элстд «Ойрат-Аренад» давулгдсн Цугǝрǝсǝн марhа секлhнд үзүлсн хальмг би ǝмтнǝ седкл байсаҗ, олыг байрлулв. Кесг ɵдрмүдин туршарт таңhчин улс социальн гɵлмǝр Ангелинан биилсн бииhин видеобичлh илгǝҗ тархав. Таңhчин ǝмтн хальмг бииhин эв-арh орулсн гимнастик үзǝд, байрлад, Ангелинад иргчдǝн олн марhаст орлцҗ, билг-эрдмǝн үзүлҗ, Хальмг Таңhчиннь нер дуудулҗ йовтха гиҗ цаhан хаалh дурдв.

КАРСАНА Евгения
Зургт: Муучкан Ангелина