Шин төв тосххар

17-04-2021, 16:14 | Таңһчин зәңгс » Зіњг

Одахн Әрәсән эрүл-менд харлһна министерствд мана таңһчд шин медицинск төвин төсвин, терүг тосхлһна болн шаңһа көтлврт оруллһна төр хәләгдв. Эн төв П.Жемчуевин нертә таңһчин эмнлһнә медлд әмтнд гүлгн гемәс хөрлһнә дөң күргдг болхмн. Селвлцәг Әрәсән эрүл-менд харлһна министрин дарук Наталья Хорова һардҗ давулв. Харһлтд Хальмг Таңһчин правительствин ахлач Юрий Зайцев, эрүл-менд харлһна министр Кикенә Юрий болн тосхлтын, көлгн-күчнә болн хаалһин эдл-ахун министр Җанҗин Виктор орлцв.
Олн халхин медицинск төвд кесг әңг үүлдхмн. Төсв белдлһнә медико-техническ даалһвриг таңһчин эрүл-менд харлһна министерств Н.Блохинан нертә гүлгн гемәс хөрлһнә номин-медицинск төвлә хамдан күцәхмн. Хөөннь терүг Әрәсән эрүл-менд харлһна министерствд батлхмн. Эн төвиг 2023-ч җилд тосххин төлә Хальмг Таңһчин социальн-экономическ делгрлтин онц көтлврин медлд эн җил төсвин-һаруһин бǝрмт цаас белдх кергтә. Тер мет федеральн инвестиционн көтлврт орхин төлә эн төсвиг батлҗ авх кергтә болҗана. Хальмг Таңһчин Толһач Хаска Бату болн правительств таңһчин делгрлтин көтлврин керг-үүлдврмүд күцәлһиг бүрткҗ, терүнд батлгдсн объектст мөңг йилһҗ өглһнә төриг федеральн йосна органмудла хамцу үүлдҗ хаһлҗана.

БАТАН Наталья

Видео