Туслмҗиг - электронн эв-арһар

20-04-2021, 16:17 | Таңһчин зәңгс » Зіњг

Пенсионн саң әмтнд зәңглхин болн шаңһа туслмҗ күргхин төлә үүлдврән өдгә цага некврлә ирлцүлҗ, шин эв-арһс өргнәр олзлна. Эндр өдр ПФР-ин сайтд 50 электронн сервис үүлднә, тегәд терүг олзлҗ гертәсн һарлго олн зүсн төр хаһлҗ болхмн. Мана таңһчд хойр миңһн һар күн пенсионн саңгин онлайн-туслмҗ олзлв.
Әрәсән пенсионн саңгин Хальмг Таңһчар үүлддг заллтын клиентск цергллтин үүлдвриг бүрдәлһнә әңгин һардач Бүүрчин Байртан келсәр, өдгә цагт ведомствд ирлго пенсионн зөвин, онц тооһин тускар медҗ, пенсьт һарлһна болн сар болһн өгдг демин мөңг (ЕДВ) авлһна, экин сертификат олзллһна туск эрлһ орулҗ, пенсин болн социальн демин мөңгнә кемҗәнә туск иткл цаас авлһна, СНИЛС-ин болн экин сертификатын то-дигин болн нань чигн халхар медҗ болхмн. ПФР-ин туслмҗ авхин төлә шаңһа туслмҗин порталд бичгдх кергтә.

Темдглхәс, «Онц кабинет» гидг әңгин эв-арһс шинрүлгдҗәнә. Тиигәд, «Экин сертификат» гидг әңгд шаңһас немр дөң авх зөв бәәдг улсин федеральн регистрас иткл цаас авхин төлә эрлһ орулж болхмн. «Электронн күч-көлснә дегтр» гидг әңгд күч-көлснә үүлдврин туск иткл цаас авч болхмн. «Онц кабинетд» ут тоодан 7 әңг бәәнә, тегәд терүнд орад, кергтә иткл цаас эс гиҗ зәңг олҗ авч болхнь әмтнд тааста болхмн.
ДАВАН Сәәхлә