Тосхлтын йовудыг бүрткх кергтә

20-04-2021, 16:18 | Таңһчин зәңгс » Зіњг

Шидр Хальмг Таңһчин Толһач Хаска Бату бат тосхлтын объектсин тосхлт, реконструкц болн бат ясвр тетклһнә региональн штабин сүүр давулв. Терүнд «2021-ч җилд таңһчин эрүл-менд харлһна түрүн дөң күрглһнә халхин шинрүллһн» гидг региональн көтлвр хәләгдв.
- Хальмг Таңһчин райодт эмчин йисн офис тосхлһна төсвин-һаруһин документац белдлһнә төрәр күүндвр болв. Таңһчин көтлвр сән йовудтаһар күцәгдхин төлә хамгин түрүнд эн төр хаһллһнд орлцҗах цуг халхс хоорндан нөкцҗ үүлдх зөвтә болна. Тер төләд объектин тосхлт өөдән кемҗәнд күцәгдхин туст девсң болһнд тосхлтын бүрдәцслә бат залһлда бәрҗ үүлдх кергтә, - гиҗ таңһчин Толһач темдглв.
Правительствин Ахлач Юрий Зайцев тосхлтын бүрдәцслә хамцу үүлдх кергтәг бас темдглҗ, цуһар арһ-чидлән негдүлҗ ниитә кевәр даавран күцәхлә ямаран чигн кергин ашнь сән болна гив. Таңһчин эрүл-менд харлһна министрин негдгч дарук Динкин Галинан зәңглсәр, райодын муниципальн бүрдәцс эн җилин 1-ч кварталд эмнлһнә бүрдәцст объектс тосхгдх һазрин участкудыг өңгәр йилһҗ өгсн бәәнә. Приютна района Песчаный селәнд эмчин офис тосхлһна төсвин-һаруһин документац белдгдв гиҗ дааврта һардач келв.
Сүүрин чилгчәр таңһчин Толһач Хаска Бату Элст балһсна бичкдүдин поликлиникин белдвриг бүрткҗ хәләв. «Удл уга поликлиник секгдхмн, тегәд мана бичкдүд сән таалд медицинск туслмҗ авч чадхмн»,- гиҗ Бату Сергеевич келв. Келхд, поликлиникд сарул болн ке-сәәхн, өдгә цага некврлә ирлцдг хорас бәәдг деерән бичкдүд нааддг талвң болн көлгн-күчнә зогсал тосхгдсн бәәнә.
Сүүрт таңһчин правительствин гешүд, райодын муниципальн бүрдәцсин толһачнр болн төсвин бүрдәцсин элчнр орлцв.
Мана зәңгч

Видео