Көдлмш олҗ авхд туслна

20-04-2021, 16:20 | Таңһчин зәңгс » Зіњг

Одахн таңһчин правительствин сүүрин залд әмтиг көдлмшәр тетклһнә цергллтин 30 җилин өөнд нерәдгдсн байрин хург болв. Терүнд Хальмг Таңһчин правительствин Ахлач Юрий Зайцев, Хальмг Таңһчар үүлддг ах федеральн инспектор Александр Беляев, Хальмг Таңһчин Улсин Хуралын (Парламентин) Ахлачин дарук Сергей Сухинин, таңһчин Толһачин селвгч Ивана Светлана, федеральн күцәгч йосна органмудын территориальн заллтсин болн олна бүрдәцсин элчнр орлцв.
– Тадн җирһлин күнд таалд туссн улст дөң-тусан күргнәт. Тана цергллтд кесг күн ирнә, эдн цуһар көдлмш олҗ авхд тадн дөң болхит гиҗ ицнә. Кесгнь шин көдлмш олҗ авна, эврә керг бүтәҗ үүлднә. Эннь тана ач-тус болҗана. Кеҗәх көдлмштн олнд туста болн күцәмҗтә болтха, – гиҗ премьер-министр дурдв.
Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина цергллтин көдләчнриг ончта өөнлә йөрәһәд, пандемийин күнд таалд көдлмшән үнн-чик седклтәһәр күцәҗәхднь ханлтан өргв. Дааврта һардач таңһчин әмтиг көдлмшәр тетклһнә цергллтин тууҗин, эндрк өдрин үүлдврин болн кех-күцәх кергүдин зуран тускар келҗ өгв. Көдлмшәр тетклһнә цергллт эн җилмүдин эргцд кесг хүврлтсин таалд үүлдҗәнә, болв тер бийнь эдн иргнмүдт күнд цагла төртнь орлцҗ, дөңгән күргҗ социальн ик чинртә керг күцәҗәнә гиҗ министр темдглв. Һучн җилин эргцд ут тоодан 344 миңһн күн көдлмш олҗ авхднь нөкд болхиг сурв, 157 миңһн һар күүнд дөң күрггдв. Цергллтин көдләчнр көдлмш уга улсин то-диг тогтаҗ, ямаран шин эрдм ода керглгдҗәхиг, альк халхд ямаран көдләчнр кергтә болҗахиг шинҗлнә. Тер мет эдн әмтнд көдлмш олҗ авхд дөңгән күргхин төлә шишлң керг-үүлдврмүд, көдлмшч ормсин яарм бүрдәнә.
Таңһчин Толһач, правительств, муниципальн йосна органмуд көдлмш уга улсин то баһруллһна, шин көдлмшч орм бүрдәлһнә, «Демографь» гидг келн-улсин төсвин медлд күцәгдҗәх керг-үүлдврмүд давуллһиг бүрткнә. Хальдврта гемәс иштә көдлмш уга улсиг дөңнлһнә, иим улс шин эрдм дасч авлһна төрмүд нег үлү һол оньгт бәәнә.
Байрин сүүрт орлцачнр таңһчд әмтиг көдлмшәр тетклһнә цергллтин өдр-бүрин туск видеофильм хәләв. Сән авъяст тохрсар, олн җилдән үнн-чик седклтәһәр көдлҗәдг, цергллтин делгрлтд ик тәвцән орулҗ йовх улсин ач-тусиг шаңһа ачлврар темдглв. Яшалтан района әмтиг көдлмшәр тетклһнә цергллтин һардач Любовь Бондарь-Пономарь Хальмг Таңһчин олна эдл-ахун ачта көдләчин нер зүүв. Кесг көдләч Хальмг Таңһчин Толһачин, Хальмг Таңһчин Улсин Хуралын (Парламентин) Ханлтын бичгүдәр, таңһчин правительствин Күндллһнә һашгудар ачлгдв.
ДООҖАН Наталья

Видео