Хотл балһсан кеерүлий!

22-04-2021, 15:02 | Таңһчин зәңгс » Зіњг

Мөрн сарла Элст балһснд бәәцин бәәдлиг ясрулхар үүлдвр шунмһадулгдна. Үвлин туршарт цуглрсн хог-богас хотл балһсан цеврлҗ авх цаг ирнә. Мөрн сар эклхин өмн Элст балһсна һардврин толһач Дмитрий Трапезников хотл балһсиг майин байрин өдрмүдт белдҗ цеврлҗ авх төр тәвсмн.

Мөрн сарин 2-ас авн балһсан цеврлҗ авлһна сара хонг эклсмн. Эн сара хонг эклхин өмн муниципалитетин толһач балһсна бәәдлиг йовҗ хәләһәд, альд ямаран көдлмш кехинь диглҗ автха гиҗ мергҗлтнрт заавр өгсмн. Пандемийин цагин санитарн саглулгч цуг заавриг чаңһар күцәһәд, балһсна цуг бүрдәцсиг субботникүдт орлцулсмн. Балһсна hардврин әмтнә бәәцин болн коммунальн эдл-ахун болн көлгн-күчнә заллтын көдләчнр эн өдрмүдт гүҗрҗ көдлсмн. Болх-болшго һазрт хог-боган хайдг әмтиг хөрхд туслх гиһәд контейнер зәрм бәәрнә өөр видеошинҗллт кедг камермүд тәвгдв. Олн давхр гермүдин залгч компаньсин зәрмснь гермүдин ораһинь шинрүлҗ ясҗана. Келхәс, эн җил гермүд залгч компаньс муниципалитетд ирх җилин дулаллһна кемд белдлһнә бәрмт цаасан орулҗ өгч, балһснд бәәдл бүклдән тоод авгдҗ белдвр кегдхмн.
Келн-улсин төсвсиг күцәһәд, Элстд бәәцин бәәдл ясруллһар баһ биш көдлмш кегдҗәнә. «Безопасные и качественные автомобильные дороги» гидг келн-улсин төсвәр кегдҗәх көдлмш эн сард дәкнәс шунмһа кевәр күцәгдҗәнә. Урднь эс күцәсән, тер мет олн-зүсн учрар һарсн дуту-дундсан уурулхар эн халхин бүрдәцс үүлдҗәнә.
Коммунальн предприятьмүд чигн эн өдрмүдт тогтсн бәәдлиг тоод авч үүлдврән күцәҗәнә. Өдр болһн олар хурдг ормст эдн цеврллһнә көдлмш кенә, хог-богиг зөөҗ һарһна. Уульнцсин шам яһҗ шатҗахинь, хаалһин светоформуд яһҗ көдлҗәхинь шинҗләд, дуту-дундс һарсинь үзхләрн тер дарунь ясвр кегднә. «Элиставодоканал» хуучрсн турвасиг сольлһна көдлмшиг эклв. Усна хуучрсн сурвлҗн Пашковин нертә уульнцд сольгдҗана.
Долан хонгин көдлмшин сүл өдрлә балһсиг цеврллһнә субботникүдт әмтн һарна. Тиим нег субботник Тодлврин паркд болсмн. Энд шин модд суулһгдв. «Буйслһн болн босхмҗ» гидг бумблвин өөр Тодлврин парк бәәнә. 2019-ч җилин намрар тернь олна үүлдәч Манҗин Николайин седвәрәр секгдсн билә. Энд ик зуудан Хальмгин һазрт урһдг модд: агч модн, жукн, шилвстә урһа модн суулһгдсмн. Давсн җилд улсин негдлтин Өдрлә Манҗин Николай үүрмүдтәһән халун һазрт урһдг пальма модд суулһсмн. Киитн ирсн кемлә тер модыг уйн баһ бәәдлднь теплицд орулҗ хадһлв. Дуларад, йосндан һазр киитнәс хөөһхлә, тер пальмс шинәс паркд ормдан батрхмн. Балһсна hардврт болн «Урһа модна эдл-аху» МУП-д модар болн уңднь орулх хар һазрар теткснднь Николай Церенович ханлтан медүлв. Иигәд бәәсн һазран цеврәр бәрлһнд, бәәцин бәәдлинь ясруллһнд күн болһн орлцх зөвтә.
Мөрн сарин 19-д гермүд дулаһар тетклhнә цаг төгсәд, залгч компаньс гермүдин ора болн нань чигн тоотыг яслһна көдлмшән эклв.
Сарин туршарт субботникүд кегдҗ, хотл балһсна уульнцс, әмтн оларн цуглрдг бәәрд цеврлгдҗ, балһсн майин байрин өдрмүдт белн болна. Мөрн сарин 24-д Цугәрәсән кемҗәнд субботник болхмн. Тиигәд балһсан цеврлҗ яслһна көдлмш мөрн сарин 30 күртл кегдхмн.
Цуг улсин хаврин ик байрт белдәд, Элст балһсна бумблвс болн талвңгуд эргҗ шинҗлгдәд, цугнь белдгднә. Балһсна hардврин сойлын заллт болхла, хѳн сарин байрин өдрмүдлә хотл балһсна әмтиг болн гиичнриг сергәҗ байрлулх кѳтлвр белдҗәнә. Элстд бәәх цуг улсин орлцлһта субботникүдин хөөн цеврдҗ, сергсн хотл балһсн хѳн сарин байриг тосчана.
ҖИРҺЛИН Кермн

Видео