Тәрлһ авснь туста

27-04-2021, 16:09 | Таңһчин зәңгс » Зіњг

Эн җилин эклцәс авн мана таңһчд коронавирусн гемәс саглуллһна тәрлһ келһнә керг бүрдәгдсн бәәнә. Тәрлһ авх улсиг бичҗ авлһиг онлайн кевәр бүрдәсн түрүн регионмудын тоод Хальмг Таңһч бас орснь темдгтә. Тиигәд, туула сарин дундурар Сарпан районд тиим эв-арһ түрүн болҗ олзлгддг болв, хөөннь таңһчин эмнлһст бас орулгдв. Ода мана таңһч тәрлһ авсн улсин тооһар орн-нутгт 7-ч орм эзлҗәнә.
Коронавирусн гемәс саглуллһна тәрлһ келһнә керг-үүлдвр эклснәс авн 30 миңһн һар күн тәрлһ авсн бәәнә. Мана таңһчд «Спутник-V» гидг вакцинә 40 миңһн доз йилһгдв. Ода райодын эмнлһст болн Элст балһсна поликлиникд, селәдин ФАП-ин улд цаг зуур үүлддг болн Элстд мобильн пунктс үүлдҗәнә. Одахн коронавирусн гемәс тәрлһ авсн Сарпан болн Яшкулин райодын 100 һар күүнә эрүл-менд шинҗлҗ хәләв. Тәрлһ авсна хөөн сара хонг давад эднә ик зууднь коронавирусн гемәс харсдг антитела бәәхнь илдкгдв. Тегәд әәмшгтә болн хальдврта гемәс саглдг вакцин ик туста болҗахнь маһд уга.
П.Жемчуевин нертә таңһчин эмнлһнә микробиологическ лабораторьт шин туслмҗ күргдг болв. Ода энд коронавирусн гемәс харсдг антитела бәәх угаһинь медҗ болхмн. Шинҗллт келһнә туслмҗнь 450 арслң күрнә.
Хальмг Таңһчин эрүл-менд харлһна министерствин то-дигәр таңһчд ут тоодан 20382 күн коронавирусн гемәр гемтв. Сүл хонгт дәкәд 8 күүнд эн гем илдкгдв. Гемтсн улсас 19691 күн цаглань эмнлһ авад эдгснь темдгтә. Таңһчин госпитальмудт эмнлһнд бәәдг улсин то сүл цагт баһрв, тиигәд ода энд 155 күн бәәнә. Гемнь күнд кевәр давҗах 9 күүнәс 5-нь ИВЛ-аппаратар кииһән авчана. Һундл төрхд, сүл хонгт эн гемәс иштә дәкәд нег күн сәәһән хәәв.
БАТАН Сәәхлә

Видео