Ɵврмҗтǝ делкǝд зуульчлсн умшачнр

27-04-2021, 16:15 | Таңһчин зәңгс » Зіњг

Әрәсән Президентин зәрлгәр 2021-ч җил номин болн технологийсин гиҗ батлгдсн билә. Бас эн җил Советин Союзин иргн Ю. А. Гагарин нарт-делкәд түрүн болҗ сансрт нисәд, 60 җил болв. Тегәд эн ончта өөн темдгләд, «Одд тал күргдгнь – дегтр» гидг төрǝр эн җилин библиосө давулгдв.
Түрүлǝд баh наста умшачнрин зǝңгллhнǝ болн сурhуль-эрдмин цутхлң «КосмоStars» библиосумерки» керг-үүлдвр бүрдǝв. «Тенд эс илдкгдǝд уга хаалhст» бичкдүдт нерǝдсн кɵтлвр, «Ɵврмҗтǝ hазрин эргндк бǝǝдл» квест-наадн, Эко-space: түңгрцг деер яhҗ зурдгин туск, «Сансрин оранжерей» мастер-классмуд болн «Əмд hазр» экологическ зәӊгллһнә тɵсв давулснь ɵврмҗтǝ болв.
Тооһин делгрлтин министерств «Тооhин технологийсин болн иргчин шин эрдм» нертә тɵсвсин тускар цǝǝлhвр ɵгч үзүлв. Министр А. Этеев, Хальмг ГУ-н эсвин, физикин болн зәӊгллһнә эв-арһсин тиӊкмин hардач Е. Сумьянова; бизнесин, экономикд зәӊгллһнә диг-дарана кафедрин ахлач Г. Казакова болн КФМГГЭУ-н зәӊгллһнә эв-арһсин кичәлмүдин комиссин һардач Ц. Катрикова ахта умшачнрин сурврмудт тодрха хәрү өгцхәв.
Асхар, долан часла, «Книгодром «Амурка» көдлмшән эклв. А. М. Амр-Санана нертә Келн-улсин дегтрин саӊгин ахлач Н. Каншаева ирсн гиичнриг, умшачнриг бүлǝн үгǝр тосҗ, олн зүсн «станцст» орхин туст үрвр кев. Дегтрин саӊд ут тоодан нǝǝмн иим станц көдлв. «Сансрин зургуд» нертǝ дегтрин дурсхлмудын региональн цутхлӊд чолун деер яһҗ зурдгин тускар шүлгч болн зурач Виктор Коксадаев келҗ өгв. Гуманитарн номин умшлһна залд Ж. Вернан, Б. Веберин үүдәврмүдәр дамҗад, «Сансрин Одиссея» марһан давулгдв. Билг-эрдмин утх-зокъялын әӊгд «Галактикәр йовһар», «Үүрмүд, хамдан дуулыя», «Бүтшго санан» гидг станцс көдлсмн. Дарани станцд умшачнр Орс драмин болн комедин театрин «Не надо печалиться» нертә наадна тасрхаг үзҗ чадв. Энүнǝс нань зәӊгллһнә библиографическ әӊгд сансрин төрмүдәр олн зүсн марһас бүрдǝгдв. «To the stars» талын келнә утх-зокъялын әӊгд англь келәр квест-наадн давв. Келн-улсин библиографин болн келн-улсин хойр ǝңг негдǝд «Санср болн Хальмг Таңhч» гидг керг-үүлдврǝр орлцачнриг тосв. Энүнд Хальмг ик сурhулин багш С. Дертеев, номин доктор Б. Бичеев, Элстин 15-ч тойгта дунд сурhулин багшнр Н. Бадмаева, С. Есенов ахта болн оютнр, сурhульчнр шунмhаhар орлцв.
Эн ик керг-үүлдвр давуллhнд таңhчин артистнр, шүлгчнр, номтнр, зурачнр, багшнр, оютнр, сурhульчнр җил болhн дɵң-тусан күргнǝ гиҗ темдглх кергтǝ. Тиим кевǝр җилд нег дǝкҗ дегтрин саңгуд йирин кɵдлмшин бǝǝдлǝн сольҗ, ɵдгǝ цагин соньн эв-арhс олзлад, билгтǝ баhчудын оньгинь авлҗ библиосɵ давуллhнд цуг чидлǝн ɵгч, дегтрин саңгиг ик ончта соньн цутхлңд хүврǝдг мɵн.

КАРСАНА Евгения

Видео