Көгҗмин болн утх-зокъялын сәәхн ниицлт

27-04-2021, 16:17 | Таңһчин зәңгс » Зіњг

1995-ч җилд эн соньн өдриг тогтасмн. ЮНЕСКО тиигхд Дегтрин болн түүрвәчин зөв-йосна нарт-делкән өдр гиҗ мөрн сарин 22 өдриг зарлсмн. Дегтр – медрл тархалһна хамгин чинртә эв-арһ болн медрлиг хадһллһна ицгтә янзнь болҗахнь тоод авгдҗ тиим шиидвр авгдсмн. Эн өдр әмтиг дегтр умшлһнд оньгинь тусхаҗадг керг-үүлдврмүд бүрдәгдх зөвтә. Нег үлү баһчудыг медрлин зөөрлә дегтрин дөңгәр таньлдсн ямаран чинртә болн туста болдгинь медүлҗ үзх кергтә гиҗ дегтрин саңгудын көдләчнр тоолҗана.
А.М. Амр-Санана нертә Келн-улсин дегтрин саңд эн өдр Элстин техническ лицейин сурһульчнр орс болн советск бичәч Константин Паустовскийин келвриг соңсв. Утх-зокъялын болн көгҗмин үүлдвр «Корзина с еловыми шишками» гиҗ нерәдгдв. Йиртмҗин бәәдлиг болн әмтнә ухан-седклиг гүүнәр, нәрн шинҗтәһәр үзүллһнд билгәрн нер һарсн Паустовскийин келвриг Хальмг Таңһчин олн-ǝмтнǝ артистк Татьяна Михеева умшв. Келвриг дахулҗ Хальмгин ачта артистк Валентина Сергунова фортепианод наадҗ, Эдвард Григин көгҗмиг татв.
Техническ лицейин ах классмудын сурһульчнр Константин Паустовскийин эн үүдәвриг оньган өгч соңсв. «Мещерская сторона», «Колхида» гидг үүдәврмүдиг бичәч бичсинь, терүнәс нань орс бичәчнрин болн зурачнрин тускар очеркс бичдг бәәсинь медҗ авв. Җирһлин хаалһд орҗах баһ наста күүнә ухан-тоолвриг бичәч йир соньнар болн умшҗах, соньмсҗах әмтнә седкл авлм тодрхаһар бичгдсинь сурһульчнр медв. Yүдәврин учр-утхинь медҗ авхд Валентина Сергунован татсн көгҗм сәәнәр туслв. Эдвард Григ үүдәсн көгҗм иигәд хойр өдрин туршарт дегтрин саңгин залд күңкнв. Яһҗ эн хойр ик үүлдәчин үүдәвр негдсн гихлә, Паустовский эврәннь келврән норвежск нертә көгҗмч Эдвард Григд нерәдсмн. Иигәд Валентина Михайловнан седвәрәр үүдсн төсвиг Татьяна Михеева болн Зоя Наранова дөңнәд, соньн эн концерт төрсмн. Сәәхн ниилвриг Хальмг Таңһчин ачта багш, Элстин техническ лицейин орс келнә болн утх-зокъялын багш Н. К. Сокольцова темдглв. Дегтрин өдрлә энүнә сурһульчнр иим туста болн сурһмҗин ик чинртә керг-үүлдврт орлцв.

ҖИРҺЛИН Кермн

Видео