Зуульчллһиг делгрүлхин төлә

27-04-2021, 16:27 | Таңһчин зәңгс » Зіњг

Федеральн Хургт җил болһн йовулдг Илгәвртән Әрәсән президент Владимир Путин улсин бәәдл-җирһлиг ясруллһнд һол оньган өгсмн. Социальн олн төрмүд дунд зуульчллһ делгрүллһнә тускар бас келгдв.
Орн-нутгин толһач зуульчллһна кэшбэкин төсвиг җилин чилгч күртл утдулхин тускар келв. «Баһ гихдән җилин чилгч күртл зуульчллһна төсвин үүлдврин болзгиг утдулх кергтә». Иргн болһнд Әрәсән аһуһар зуульчллһна путевк авлһнд һарһсн мөңгнә 25 процентинь даңцалһнд Әрәсән правительств дәкн хойр миллиард арслң мөңг йилһҗәнә.
Кэшбэкин кемҗән зуульчллһнд һарһсн мөңгнә 20 процентинь тогтахмн. Болв тер мөңгн 20 миңһнәс давх зөв уга. Нег йовлһна туст тернь тиигҗ йилһгдҗәнә. Йовлһн болад уга бәәтл тер мөңгн тоолгдҗ, кэшбэк даңцагдҗ чадҗана. Иим үүлдврин һурвдгч девсң моһа сарин 18-д эклсмн. Кэшбэкин үүлдвр мөчн сарин 15 күртл үүлдхмн. Зуульчллһна йовлһн мөчн сарин 30 күртл күцәгдхмн.
Зунын цагт бичкдүдин эрүл-мендинь батллһнд В. Путин ик оньган өгчәнә. Цуг бичкдүдт амрлһн туста болдгиг күцәх кергтә гисн заавриг орн-нутгин толһач өгчәнә. «Энүнлә залһлдулҗ, зунын лагерьмүдт амрх сурһульчнрин путевксин мөңгнә өрәлинь данцах кергтә», - гиҗ президент иткүлҗ келв.
Эн илгәврин һол төрмүдиг темдгләд, Хальмг Таңһчин Толһач Хаска Бату орн-нутгин кемҗәнд дотр-дундын зуульчлһ делгрүллһнд президент баһ биш оньган тусхасиг келв. Зуульчллһн олн халхта үүлдвр, тегәд таңһчд зуульчллһн сән делгрлт авхд туслх тохнята болн дигтә-дарата көдлмш кегдх зөвтә гиҗ тоолҗана.
Оютнрин зуульчллһна шин эв-арһиг тоолҗ, үүлдврт орулхин тускар чигн Владимир Путин эврәннь илгәвртән келв. «Оютнрин зуульчллһна төлә немр эв-арһ ухалҗ, эн җилин бийднь пилотн шин төсвсиг үүлдврт орулҗ үзх кергтә» – гиҗ президент тоолҗана. Амрлһнд эс гиҗ экскурьст йовҗах баһчуд ик сурһулин кампуст болн общежитьд бәәҗ, хаалһд һарчах мөңгиг баһлх зөвтә. Таңһчин зуульчллһна зәңгллһнә цутхлңгин ахлач Манҗин Маринан келсәр, кэшбэкин зуульчллһна төсвин болзгинь утдуллһн дотр-дундын зуульчллһна делгрлтд йовуд өгсн деерән әмтнә эрүл-мендин бәәдл батллһнд чигн туслҗана. Хамгин түрүнд, әмтн эврә орн-нутган сәәнәр медҗ авхмн болҗана. Йосна халхас дөң өггдҗәхлә, мөңгнь хатяр әмтн чигн йовҗ амрхмн. Бичкдүдин амрлһиг бүрдәлһнд, оютнриг һазр-уснлань таньлдуллһна халхар чигн баһ биш дөң күрггдҗәнә. Баһ цагтан орн-нутгарн йовҗ, сергмҗтәһәр амрхд, шин олн тоотыг медҗ авхд эннь йир сән дөңцл болҗана.
УШКАНА Сувсн

Видео