Гер-бүүр тосхлһна туст

26-04-2021, 16:32 | Политика

ҖАНҖИН Виктор, Хальмг Таңһчин тосхлтын, көлгн-күчнә болн хаалһин эдл-ахун министр:
- Әрәсән Президент Владимир Путин Федеральн Хургт кесн Илгәврт онц гер-бүүр тосхлһиг дөңнлһнә керг-үүлдврмүд батлх кергтә гиҗ келв. Гер-бүүр олар тосхгдхла, тер цагт орн-нутгин өрк-бүлмүдт терүг хулдҗ авхд амр болх. Җилд 120 сай дөрвлҗн метр аһу гер-бүүр тосххин туск зураг күцәх кергтә. Давсн җилд тосхлтын халх дигтә-даратаһар үүлдв, 80 сай дөрвлҗ метр аһу гер-бүүр эдлврт орулгдв. Шин объектс өөдән чинртәһәр тосхгдх зөвтә, гиҗ президент темдглв.
Орн-нутгин толһачин заасн төрмүд күцәхин төлә регионмудт федеральн бюджетәс 15 җилә кемд мөңгн өгъялҗ өггдхмн . Тер мөңгәр онц гер-бүүр тосхҗах улст дөң күргхмн гиҗ зуралгдҗана. Жилищн-коммунальн эдл-ахун, көлгн-күчнә болн хаалһсин, гер-бүүрин тосхлтын төрмүдт мөңгн күртдгонь нуувч биш. Тегәд тиим льготн кредит гер-бүүр тосхлһна кемҗәг икдүллһнд туслхмн.
Эндр мана таңһчд эдлврт орулгдҗах гер-бүүрин өрәлнь онц эздүд тосхсн гермүд болна. Тегәд Әрәсән Президент илгәвртән әмтнә гермүдиг газар тетклһнә төр босхсинь олн-әмтн байртаһар тосв. Әмтнә участкудт газ өңгәр орулгдх гисн седвәр гер-бүүр тосхлһнд бас туслхнь лавта гиҗ сангдна.

Видео