Селәдт шишлң көлгн кергтә

27-04-2021, 16:32 | Политика

ОБГЕНА Церн, Көтчнрә района Тугтн селәнә ФАП-ин фельдшер, Хальмг Таңһчин эрүл-менд харлһна ачта көдләч:
- Әрәсән Президент Федеральн Хургт кесн Илгәврт социальн чинртә төрмүд һол орман эзлдгнь сән авъяст тохрв. Эн җил кесн илгәврт орн-нутгин толһач эрүл-менд харлһна төрмүдт онц оньг өгснь темдгтә. Хамгин түрүнд Владимир Путин коронавирусн гемәс хөрлһнд эрүл-менд харлһна көдләчнр үнн кевәр көдлснә, кесг күүнә әм аврсна ач-тусинь темдглснь омгта. Давсн җиләс авн бидн эн әәмшгтә гемәс хөрҗ, ик дааврта амр биш таалд көдлҗәнәвидн. Мана селәнә улсиг эн хальдврта гемәс гетлхәр бидн санитарн-эпидемиологическ керг-үүлдврмүд күцәҗәнәвидн. Келхд, Көтчнрә районд мана селәнд хамгин баһар әмтн гемтв. Ода бидн эн гемәс саглуллһна тәрлһ кеҗәнәвидн. Селәнд 234 бөдүн күн бәәнә, теднәснь 60 процентнь тәрлһ авв. Мана төрскн селәнд эпидемиологическ бәәдл цааранднь чигн тогтун болхин төлә тәрлһнә керг-үүлдвриг күцәмҗтәһәр давулхар зүткҗәнәвидн.
Орн-нутгин толһач селәдин эмнлһсиг шишлң көлгн-күчәр теткхин тускар келв. Тиигәд, өөрхн һурвн җилин туршарт 5 миңһн шишлң көлгн йилһгдхмн гиҗ Владимир Путин зәңглв. Мана селәнд «Эрүл-менд харлһн» гидг келн-улсин төсвәр модульн ФАП тосхгдв. Көтчнрә района муниципальн бүрдәц терүг кергтә өлг-эдәр теткв. Сүл җилмүдт маднд шишлң көлгнә төр нәрн болҗана, тегәд тиим маши йилһхлә бәәрн улст медицинск дөң күрглһнә таалнь ясрхнь лавта. Нег үлү ода, бәәрн улс дунд тәрлһ кеҗәх, диспансеризац бүрдәҗәх цагт маднд шишлң көлгн кергтә болҗана. Әрәсән Президент эрүл-менд харлһна төриг һоллгч гиҗ тоолҗ, эмнлһсин материальн-техническ ул батруллһна, әмтнә эрүл-менд шинҗллһнә, медицинск туслмҗин чинр ясруллһна төрмүд босхснь көдлмшән улм сәәнәр күцәхд урмд өгв.

Видео