Эдн түрүн дөң күргнә

29-04-2021, 14:15 | Таңһчин зәңгс » Зіњг

Давсн җилд пандемий учрад, коронавирусн гемәс хөрлһнә күнд-күчр бәәдл тогтсн цагт мана орн-нутгт түргн дөң күрглһнә көдләчнрин Өдр зарлгдв. Эн цергллтин улс гемтсн әмтнд түргн дөң күргҗ, эднә эрүл-менд харлһнд церглсн деерән күүнә әм аврлһнд туслна. Пандемий учрсн цагт эднә даавр кесг холванд өсв, юңгад гихлә эдн хальдврта гемтә улсла цугтаһаснь түрүлҗ харһна.
Хальмг Таңһчин Толһач Хаска Бату эн цергллтин көдләчнрин ач-тус өөдәнәр үнлҗ, эднә күч-көлсн ик дааврта болҗахиг темдглв. «Тадн өдр-сө уга мана эрүл-менд харлһнд церглҗ, бачм дөң күргхәр адһнат. Коронавирусн гемәс хөрлһнә күнд цагт тадн зөрмгән үзүлҗ, күн болһнд килмҗән тусхаҗ көдлвт. Давсн җилд медицинск дөң күрглһнә чинриг өөдлүлхин болн цергллтин үүлдвриг ясрулхин төлә 23 шишлң көлгәр тетксн биләвидн. Көдләчнрин то 2019-ч җиллә дүңцүлхлә 32 процентд икдв. Көдлмшән үнн-чик седклтәһәр, ик даавртаһар күцәҗәх төләдтн ик ханлтан өргҗәнәв», – гиҗ таңһчин Толһач йөрәлин үгән нерәдв.
Әрәсән Президент Владимир Путин Федеральн Хургт кесн Илгәврт түргн дөң күрглһнә цергллтин үүлдвриг ясруллһна, материальн-техническ ул батруллһна тускар бас келв. Тиигәд, өөрхн һурвн җилин туршарт селәдин эмнлһст түргн дөң күрглһнә төлә 5 миңһн шишлң машин йилһгдхмн. Эннь селәдт бәәдг улст медицинск дөң күрглһнә чинриг ясруллһнд туслхмн.
Эндр Элст балһснд түргн дөң күрглһнә станцд 13 бригад үүлдҗәнә, теднәс һурвнь коронавирусн гемәр гемтсн улс тал һарч йовна. 2018-ч җилд эдн 60 җилин өөнән темдглсмн. Эндр энд зу һар күн көдлнә, ик дамшлтта болн өөдән мергҗлттә көдләчнр энд күч-көлснә хаалһан эклҗәх баһчудт медсән зааҗ, хамдан ниитәһәр үүлднә. Сән дурар үүлддг баһчуд өцклдүр эдниг сән өдрин байрла йөрәҗ, белгүдән бәрүлҗ өгв. Тер мет социальн гөлмд «Минутын үн» гидг төрәр онлайн флешмоб давулҗ, әмтнд түргн дөң күрглһнә бригад дуудҗ авлһна зокалын туст цәәлһвр өгв.
БАТАН Сәәхлә

Видео