Хаврин болн күч-көлснә байр

29-04-2021, 14:45 | Таңһчин зәңгс » Зіњг

Май сарин 1 шинд нарт-делкәд 86 орн-нутгт, тер тоод Әрәсәд, хаврин болн күч-көлснә Өдр темдглнә. Мана орн-нутгт эн өдр сән авъяст тохрсар күч-көлснә коллективс митингд орлцҗ, көдләчнрин зөв харслһна төр босхна. Советин йосна цагт эн өдриг өргмҗтәһәр болн байртаһар темдглдг бәәсмн.
Өрк-бүл болһнд терүнд ик эртәснь белдвр кеҗ, гер-бүүрән, герин эргндк һазриг ахулдг билә. Мана орн-нутгт хүврлт болсна хөөн эн өдриг урдк кевәрн темдглҗ байрин керг-үүлдврмүд давулгдна. Хәрнь давсн җилд коронавирусн гем учрсна ашт олн-әмтн орлцдг байрин керг-үүлдврмүд болсн уга.
Эн җил Әрәсән Президент Владимир Путинә зәрлгәс иштә хөн сарин 1-әс авн 10 күртл амрлһна өдрмүд зарлгдв. Роспотребнадзорин һардач Анна Попова коронавирусн гемин тархалһиг баһрулхин төлә, эн өдрмүдиг әмтн гертән өрк-бүләрн давулхин төлә амрлһна өдрмүд кехлә сән болхмн гисн селвг орулсмн. Орн-нутгин толһач терүг дөңнәд, амрлһна өдрмүдин туск зәрлг батлсинь олн әмтн байртаһар тосв. Эн өдрмүдт цогц-махмудан батрулҗ, цаган тустаһар давулҗ чик авг-бәрцәр бәәх кергтә.
Авъяст тохрсар эн өдр байрин концерт, спортивн марһас, мөрнә урлдан болна. Көтчнрә района Ергенинский селәнд мөрнә урлдана ик байр давна. Эн җил терүг Аршанск хурлын 25 җилин өөнд нерәдҗәнә. Спортивн болн байрин керг-үүлдвриг бүрдәлһнд Бурхн Багшин Алтн сүм орлцҗ, һол мөр зарлсн бәәнә. Эн өдр болх байрин керг-үүлдврмүд Роспотребнадзорин санитарн некврлә ирлцҗ давулгдх зөвтә.
Шидр таңһчин сурһуль-эрдмин көдләчнрин профсоюз сурһуль-эрдмин бүрдәцс дунд зургудын марһа зарлв. Терүнд хуучн цага зургуд болн плакатмуд дуралһҗ багшнр зург цокҗ социальн гөлмд барлҗана. Эпидемиологическ бәәдләс иштә олна хургуд эс давулгдҗахас иштә иим марһас бүрдәгдҗәнә.

ДООҖАН Наталья

Видео