Хурлын төрмүдәр күүндв

29-04-2021, 15:09 | Таңһчин зәңгс » Зіњг

Мөрн сарин эн өдрмүдт Хальмгин шаҗн лам Тэло Тулку ринпоче көдлмшин кергәр кесг харһлт кев.
Хальмгин тосхлтын министр Җанҗин Викторла буддистнрин толһач харһҗ күүндв. «Геден Шеддуб Чой Корлинг» хурлыг әмтн хоорндан Аршанск хурл гиҗ нерәднә. 1996-ч җилд секгдсн цагас авн 25 җил болҗах эн хурл «Сәкүсн Сүм» гиҗ нерәдгднә. Хурлын гелңгүд бәәдг герин хаҗуднь бәәсн хаалһ хату девскрәр бүрклһнә төрәр күүндвр болв.
Дарани нег харһлтнь Әрәсән Сбербанкин Хальмг әңгин һардач Вениамин Кимла болв. Харһлтын йовудт Тэло Тулку ринпоче Хальмгин төв хурлд эргндк бәәдлинь ясҗ сәәхрүллһнә төсвиг белдлһнә көдлмш кегдҗәхин тускар келҗ өгв.
Бурхн Багшин Алтн сүм Хальмг Таңһчин нернлә залһлдата нег сәәхн темдгнь болсмн. Нааран җил болһн кесг миңһн зуульчнр болн гиичнр ирнә. Давсн җилд эн хурл 15 җилин өөнән темдглв. Ода Төв хурлын эргндк бәәриг ясрулҗ, улм кеерүллһнә төр экләд хаһлгдҗана.
Әрәсән Сбербанкин Хальмг әңг, нөкцҗ үүлдхәр бәәхиг һардач В. Ким күүндврин йовудт медүлв.

Видео