Өөнләнь йөрәв

29-04-2021, 15:09 | Таңһчин зәңгс » Зіњг

Хальмгин шаҗн лам Әрәсән ачта зурач Васькинә Владимир тал золһҗ одв. Хальмг Таңһчин күндтә иргн Владимир Савельевичиг одахн темдглсн найн җилә өөнләнь йөрәв.
Әрәсән болн Хальмгин зурачнрин ниицәнә гешүн, билгтә скульптор «Сәкүсн Сүмд» болн «Бурхн Багшин Алтн сүмд» Бурхн Багшин ик көшәсиг кевлҗ кесн ик эрдмтә зурач болҗана. Эн ик хурлмудт хамгин әрүн дүр тогтасн деерән Яшкульд, Комсомольскд, Ик Царңд бәәх хурлмудт Васькинә Владимирин урн һарар үүдәгдсн Бурхн Багшин дүрмүд шаҗнд шүтдг улсин өдр болһни мөргүлин евәлд бәәнә.
Хальмгин шаҗн лам Владимир Савельевичиг өөнләнь йөрәһәд, бат эрүл-менд болн үүдәгч күцәмҗ дурдв. Седклән медлцлһнә бәәдлд болсн күүндврин йовудт билгтә зурач иргч зуран тускар шаҗн ламд келҗ өгв.

УШКАНА Сувсн

Видео