Яшалтан районд болсн харһлтс

13-05-2021, 14:16 | Таңһчин зәңгс » Зіњг

Хальмг Таңһчин Толһач Хаска Бату көдлмшин кергәр Яшалтан районд одсн цагтан Эсто-Алтай селәнд «Колосок» гидг бичкдүдин садт одв. Тенд таңһчин Толһач Яшалтан района муниципальн бүрдәцин толһач Чиҗин Үлмҗлә болн садын гериг тосхсн «Альянс-строй» ООО-н күцәгч һардач Мөңкувшан Виталийла хамдан сурһулин бүрдәцин тосхлтын төрәр күүндв.
Шин бичкдүдин сад мөрн сард секгдх бәәсмн. Болв тенд зәрм дуту-дундс илдкгдв, тегәд таңһчин Толһач цуг эндүг ясх неквр тәвв. «Тосхлтын бүрдәц көдлмшән кергтә кевәр эс күцәсән медҗәнә. Мөчн сарин 1 шин күртл эдн цуг дуту-дундсиг уга кеҗ, көдлмшиг өөдән чинртәһәр дуусх үгән өгв. Мана бичкдүдин төлә бидн сән таал тогтаҗ, цугинь үнн-чик седклтәһәр кех зөвтәвидн», – гиҗ Бату Сергеевич келв.
Тер өдрин бийднь таңһчин Толһач «Сергиенко» нертә крестьянск-фермерск эдл-ахун услврин участкд одв. Хаска Батун темдглсәр, районд мелиоративн керг күцәмҗтәһәр делгрҗәнә. Эн эдл-ахун һардач Александр Сергиенко маднд услврин участкуд болн ус цуглулдг боодг үзүлв. Ода дәкәд нег боодг ясҗахнь энд ямаран аһу ик көдлмш күцәгдҗәхиг ил үзҗ болхмн гиҗ Бату Сергеевич темдглв.
Александр Сергиенко 2020-ч җилд «Әрәсән мелиоративн комплексин делгрлт» гидг ведомственн көтлврт болн «Селәнә эдл-ахун комплексин эдл-уушин экспорт» гидг федеральн төсвд орлцв. Эндр эн эдл-ахуд услдг зурһан машин углҗ тәвгдв, ус цуглулдг боодгт бат ясврин көдлмш кегдв, дәкәд нег боодгт көдлмшин өрәлнь күцәгдсн бәәнә. Дәкәд энд электрокүчнә линий, ус сордг кергсл бас углҗ тәвгдҗәнә. Цуг эн көдлмш 2021-ч җилин чилгчәр төгсхмн гиҗ зуралгдҗана.
Александр Сергиенко ик дамшлта фермер, көдлмшән йилһән сәәнәр меднә, эзни хәләцтәһәр көдлҗәнә гиҗ таңһчин толһач темдглв. «Һардач болһн эврәннь төсвиг тохнятаһар күцәҗ, цугинь өөдән чинртәһәр седклән өгч үүлдх зөвтә», – гиҗ Бату Сергеевич келв.
Хальмг Таңһчин Толһачин һардврин ахлач Берика Чингис болн таңһчин селәнә эдл-ахун министр Мөңкнасна Максим көдлмшч харһлтст бас орлцв.
Барт белдснь ДООҖАН Наталья

Видео