Хальмгин өлзәтә үрнд

13-05-2021, 14:23 | Таңһчин зәңгс » Зіњг

Алдр Диилврин Өдр угтад Элстд Городовиковин нертә уульнцд 13-ч тойгта герин эрс деер Петр Васильевич Кирбасовд нерәдсн санлын самбр секгдв. Эн Төрскән харсгч Алдр дәәнд орлцҗ, Берлинд күрч, Хальмг АССР-ин бәәрн үүлдврин түрүн министрин болн ЖКХ-н министрин үүлд үнн-чик седклтәһәр көдлҗ төрскн һазриннь босхмҗд ик тәвцән орулсн күн болна. Дәкәд Петр Васильевичин нилчәр Семен Липкин мана алдр «Җаңһр» дуулвриг орс келнд орчулсмн.
Хальмг Таңһчин правительствин Ахлачин дарук Наран Кюкеев, Элст балһсна администрацин толһачин дарук Галина Васькина, таңһчин ЖКХ-н болн энергетикин министрин үүл дааҗадг Виктория Мангутова, Петр Васильевичиг медҗ йовсн улс, элгн-саднь санлын самбр секлһнд орлцв. Цуһар эдн Петр Васильевичин тускар бүлән үгән келҗ, тодлврарн хувалцв. П.Кирбасов ик дааврта, өөдән мергҗлттә, кергән йилһән сәәнәр меддг, өвкнриннь сойлыг, авъясиг күндлдг төрскнч седклтә күн билә гиҗ цуһар темдглв. 1957-ч җилд Петр Кирбасов цергәс бууҗ ирәд, төрскн таңһчиннь босхмҗд орлцв. Петр Васильевич олна көдлмшт шунмһаһар орлцдг билә, эн Хальмг АССР-ин Деед Советин түрүн хуралын депутатд суңһгдсмн. Мария Бадминовна авальтаһан Виталий, Бадм болн Нина һурвн үрән өскв. П.Кирбасов Улан Одн орденәр, «Цергә туурмҗин төлә», «Сталинград харссн төлән», «Төрскән харсгч Алдр дәәнд Германиг диилсн төлә», «Советин әәрмин болн флотын 30 җилин өөнд» гидг медальмудар ачлгдсмн.
Эн керг-үүлдврт Петр Васильевичин Сергей болн Нарн зеенрнь орлцад, аавиннь нер мөңкрүллһнә седвәр татсн Хальмг Таңһчин Олна палатын гешүн Александр Болтыровд, харһлтд орлцсн улст ханлтан өргв. Ээҗнь Мария Бадминовна ачнр-зеенртән Петр Васильевичәс үлгүр авч, неринь өөдән бәрҗ, төрскн һазр-усндан, сойлдан эңкр болтн гиҗ селвг өгдг бәәсиг эдн тодлҗ келв.

БАТАН Сәәхлә
ЗУРГТ: Петр Кирбасовин санлын самбр секлһнд орлцачнр
Авторин цоксн зург

Видео