Цергә дааврта улсиг ачлв

13-05-2021, 14:39 | Таңһчин зәңгс » Зіњг

Хөн сарин эклцәр темдглдг сән өдрмүд угтҗ П.Жемчуевин нертә таңһчин эмнлһнд болсн байрин хургт Хальмг Таңһчин цергә комиссариатын һардвр орлцв. Таңһчин цергә комиссар Сарңга Андрей болн энүнә дарук Валерий Лукьянченко эмнлһнә көдләчнрлә харһҗ, өөрдҗ йовх сән өдрмүдин байрла эдниг йөрәв. Темдглхәс, эн эмнлһнд 700 шаху күн цергә тоод бәәнә.
– Коронавирусн гем учрснас авн тадн эн гемәс кесг кү эдгәҗ авлһнд үнн кевәр церглҗ йовнат. Тадн цуһар цергә даалһврта улс болҗ күнд эпидемиологическ цагт бийән әрвллго кесг күүнд тусан күргҗ бәәнәт. Мана цергә комиссариатын көдләчнр дунд бас кесгнь эн хальдврта гемәр гемтв, болв цуһар эдн эдгв. Цуг таанрт бидн ик ханлт өргҗәнәвидн, көдлмштн күцәмҗтә болтха. Дән-даҗг уга, цуһар эрүл-менд бәәтхә, – гиҗ Андрей Юрьевич дурдв.
Таңһчин цергә комиссариатын шиидврәр эмнлһнә зәрм көдләчнрин ач-тусинь темдглҗ, Күндллһнә һашгудар ачлв. Ачлвр авсн улс дунд таңһчин эмнлһнә ах эмчин дарукс Орһан Виктор, Чумпина Саглр, эмчнр Пеедрǝ Евгений, Җалсана Татьяна, Бадмин Вениамин, Сарңга Валерий, Потнян Светлана, дунд медицинск көдләчнр Хотуна Кермн, Могушка Лейла орв. Тер мет цүүгән болсн һазрт төвкнүн бәәдл тетклһнд цергә даалһвр күцәҗ йовсн җолач Милиевин Николай болн юрист Дорҗин Виталий бас Хальмг Таңһчин цергә комиссариатын Күндллһнә һашгудар ачлгдв.
Месллһнә әңгин һардач хирург Пеедрǝ Евгенийин келсәр, эн Элст балһсна 17-ч тойгта дунд сурһульд сурчасн цагтан эмч болхар шиидв. Тегәд эмчин эрдм дассна хөөн эн хөр һар җилдән таңһчин эрүл-мендин халхар хирург эмчǝр көдлҗ йовна. Пандемий учрсн цагт урднь үзгдәд уга коронавирусн гемәс хөрлһнә керг күцәхд йир дааврта болн күнд-күчр болв. Тер бийнь бидн эмчин даавран үнн-чик седклтәһәр күцәх зөвтә болад, гемтә улст дөңгән күргҗ йовнавидн. Коронавирусн гем учрсн бийнь кесг улст месллһ кех кергтә болв, гиҗ зәңглв.
БАТАН Наталья

Видео