Нөкцлт батрулхар

13-05-2021, 14:40 | Таңһчин зәңгс » Зіњг

Хальмг Таңһчин Толһач Хаска Батун даалһврар таңһчин эрүл-менд харлһна министерств болн Əәдрхнә медицинск ик сурһуль (АГМУ) хоорнд нөкцлтин бооцан батлгдв. Терүнә халхар ямаран төрмүд хаһлгдхин тускар таңһчин эрүл-менд харлһна министр Кикенә Юрий олнд зәңгллһнә эв-арһсин көдләчнрлә болсн харһлтд келҗ өгв.
– Одахн Хальмг Таңһчин Толһачин селвгч Ивана Светлана болн П.Жемчуевин нертә таңһчин эмнлһнә ах эмч Бадм-Һәрән Очр Әәдрхнд одад, тенд медицинск ик сурhулин һардврла харһҗ күүндв. Тер харһлтын ашар хамцу үүлдврин бооца батлсмн. Тегәд терүгәр мана эмчнрин мергҗлт өөдлүллһнә, ик сурhулин улд номин үүлдвр күцәлһнә, тенд сурчах мана оютнр таңһчин эмнлһст дамшлт хоршалһна төрмүд хаһлгдхмн. Тер мет АГМУ-н багшнр мана таңһчин эмнлһсин эмчнрт селвлцǝ давулҗ, гемтә улсиг эмнлһнә туст дөң болхмн. Дәкәд Хальмгт ик сурhулин әңг секлһнә тускар күүндвр болв. Эн төриг Әрәсән эрүл-менд харлһна министерствлә хамдан хаһлхвидн, – гиҗ Юрий Викторович келв.
Дааврта һардачин келсәр, ик сурhульд немр эрдм даслһна төр бас хаһлгдхмн. Энүнә төлә немр сурһуль-эрдмин тиңкмд мана таңһчин эрүл-менд харлһна көдләчнр өңгәр сурч чадхмн. Тиигәд терапевтин, кардиологин, хирургин, травматологин эрдм дасч авхмн. Дәкәд энүнд заочн кевәр аспирантурт сурч болхмн. Цуг эн төрмүд хаһлгдҗ, эмчнрин мергҗлтǝр тетклһнә төр ясрх, гиҗ министр темдглв.
Брифингин йовудт коронавирусн гемәс саглуллһна тәрлһ авлһна, Элстд бичкдүдин поликлиник секлһнә тускар күүндвр болв. Ода деерән мана таңһчд 30 миңһ һар күн тәрлһ авв. Мана таңһчд 124 миңһн күн тәрлһ авх зөвтә гиҗ зуралгдсмн, тегәд терүнәс зуг 26 процентнь тәрлһ авв. Көтчнрә болн Октябрьск райодт эн керг-үүлдвр күцәмҗтәһәр бүрдәгдв, тенд бәәрн улсин өрәлнь гилтә тәрлһ авв, гиҗ Юрий Викторович келв. Элстд болн Хар Һазра районд эн кергиг шунмһадулх кергтә. Хөн сарин чилгчәр хотл балһснд бичкдүдин поликлиник үүлдврән эклхин тускар министр зәңглв.

ДООҖАН Наталья

Видео