Гемтә улсин то дәкнәс өсчәнә

15-05-2021, 12:00 | Таңһчин зәңгс » Зіњг

Хальмг Таңһчин ах санитарн эмч Санҗин Җаңһрин зәңглсәр, сүл цагт коронавирусн гемәр гемтсн улсин то дәкнәс өсчәхнь темдглгдҗәнә. Мөрн сарин дунд эпидемиологическ бәәдл ясрад, хальдврта гемәр гемтсн улсин то баһрҗасн болхла ода теднә то өдр ирвәс өсәд йовна.
Намрин кемд әмтн олар царцдг кем эклхәс урд коронавирусн гемәс саглуллһна тәрлһнә керг-үүлдвриг күцәх кергтә. Мана таңһчд бәәдг улсин 60-70 процентнь тәрлһ авхла эпидемиологическ бәәдл ясрад бәәхмн. Ода болхла мана таңһчд 34 миңһн һар күн тәрлһ авсн бәәнә. Эннь тәрлһ авх улсин зураһас зуг 30 процентнь болна. Мана таңһчд коронавирусн гемәс саглуллһна тәрлһ келһнә керг-үүлдвр му бишәр бүрдәгдсиг үнләд, федеральн төв немр вакцин йилһсмн. Темдглхәс, ода таңһчд һурвн вакцин бәәнә, тегәд күн болһн таастаһинь шүүҗ авч тәрлһ кеҗ чадҗана. Тәрлһиг райодын эмнлһст болн балһсна поликлиникд кесн деерән мобильн пунктд бас кеҗ болхмн.
Таңһчин эрүл-менд харлһна министерствин то-дигәр, пандемий эклснәс авн 20615 күн коронавирусн гемәр гемтв. Сүл хонгт тедн деер 13 күн немгдв. Хәрнь, 19928 күн эмнлһ авсна хөөн эдгсн бәәнә. Гемнь күнд кевәр давҗах 10 күүнәс зурһань ИВЛ-аппаратар кииһән авчана. Ода таңһчин госпитальмудт 151 күн эмнлһнд бәәнә, таңһчд һурвн госпиталь үүлдҗәнә. Өдр болһн эн хальдврта гемәс әмнәсн хаһцсн улсин то бас икднә, тиигәд ода эн гемәс иштә 360 күн хорв. Гемнь невчк гиигнәр давҗах хойр зун күн гертән эмнлһ авч эмчнрин хәләврт бәәнә.
Удл уга зуни амрлһна цаг эклхмн, тегәд эн кемиг сергмҗтәһәр давулхин төлә саглуллһна тәрлһ авх кергтә гиҗ эрүл-менд харлһна көдләчнр селвг өгнә. Келхд, тәрлһ авсн улс гемтсн цагт гемнь гиигнәр давдгиг эмчнр темдглнә. Тегәд бийиннь болн өөрхн улсиннь тускар ухалад, тәрлһ авх кергтә.
БАТАН Сәәхлә

Видео