Эрүл-менд харлһна көдләчнриг йөрәв

15-05-2021, 12:02 | Таңһчин зәңгс » Зіњг

Шидр Хальмг Таңһчин Толһач Хаска Бату нарт-делкәд медицинск эгчин Өдрт нерәдгдсн байрин керг-үүлдврт орлцв. Эн Хахлына Тамаран нертә медицинск колледжд болв. Керг-үүлдврт орлцачнр хөн сарин 11-д Хазн балһснд әмнәсн хаһцсн улсин санл тевчәд, нег агчмд тагчг зогсв.
Таңһчин Толһач медколледжин аккредитационн төв хәләв. Тенд сурһулян төгсәҗәх оютнр шүүврән өгч аккредитацин туск сертификат авна. Темдглхәс, колледжд медицинск эгчин, фельдшерин, акушерин эрдм дасхин төлә өдгә цага кергсл бәәнә. Оютнр бийснь терүг олзлҗ ямаран кевәр эрдм дасдгиг таңһчин Толһачд үзүлв. Эн баһчуд эрүл-менд харлһна көдләчин эрдм даавртаһар шүүҗ авсиг үзәд, бахмҗ кеҗ эднд иткҗәнәвидн гиҗ таңһчин Толһач темдглв.
- Мана җирһлд ямр нег йовдл учрхла медицинск эгчнр түрүн зергләнд һарна. Тадн тал бидн дөң сурҗ ирнәвидн. Одахн бидн Төрскән харсгч Алдр дәәнд Диилвр бәрснә 76 җилин өөн темдглвидн. Мана Төрскниг хортнас харссн болн сулдхсн баатрмудын залу-зөрмг йовдлмудыг бидн тодлсн биләвидн. Эндр болхла тадн цергчнр болҗанат. Тадн пандемийәс хөрлһнә кергт ик тәвцән орулҗ кесг күүнә әм аврлһнд дөң болҗанат. Эндр Хальмгт 2474 дунд медицинск көдләч таңһчин эмнлһст көдлҗәнә. Күн болһнд ханлтан өргҗәнәв, – гиҗ Бату Сергеевич келв.
Байрин хургт таңһчин эрүл-менд харлһна халхд олн җилдән үнн-чик седклтәһәр көдлҗ йовх көдләчнрт Әрәсән Президентин болн Хальмг Таңһчин Толһачин болн Хальмг Таңһчин Улсин Хуралын (Парламентин) Ахлачин Ханлтын Бичгүд, таңһчин правительствин болн эрүл-менд харлһна министерствин Күндллһнә һашгуд бәрүлҗ өгв.
Таңһчин һардвр эрүл-менд харлһна көдләчнрин төлә сән таал тогталһна туст цугинь кеҗәхиг Хаска Бату темдгләд, эн төр хаһлхд амр биш, болв тер бийнь эн туст цуг арһ-чидл олзлгдҗана гив.
- Медицинск эгчин өдр дигтә Үрс сар болн Ураза-байрам әрүн сән өдрмүдлә ирлцснь орта. Хөвтә-кишгтә болтн, сансн санантн күцтхә, – гиҗ таңһчин Толһач дурдв.
Таңһчин эрүл-менд харлһна министр Кикенә Юрий йөрәлин үг бас келәд, көдлмшән үнн-чик седклтәһәр болн даавртаһар күцәҗәх төләднь ханлтан өргв. Министр таңһчин правительствин Ахлач Юрий Зайцевин илгәсн йөрәлин бичг умшв.
Барт белдснь БАТАН Сәәхлә

Видео