Сән гисн өрк-бүлмүдиг ачлв

15-05-2021, 12:06 | Таңһчин зәңгс » Зіњг

Хөн сарин 15-д цуг нарт-делкәд өрк-бүлин Өдр темдглнә. Күн болһна җирһлд өрк-бүл хамгин һоллгчнь болн үнтә зөөрнь болна. Эк-эцк болһн күүкдиннь төлә цугинь кехәр шунна, өлзәтә сән үрд өскхин төлә чик сурһмҗ өгнә. Сән авъяст тохрсар эн сән өдрлә өнр-өсклң, отг-әәмгтән күндтә, олна бәәдл-җирһлд шунмһаһар орлцдг өрк-бүлмүдиг йөрәҗ, эднә күцәмҗәр бахмҗ кенә.
Одахн таңһчд «Җилин сән гисн өрк-бүл» гидг Цугәрәсән марһана аш диглгдв. Терүнд Көтчнрә района Ергенинск селәнд бәәдг олн үртә Михаил болн Валентина Анджаевихнә өрк-бүл диилвр бәрв. Эдн намртан мана таңһчин нериг Цугәрәсән марһанд харсхмн.
Эн марһанд Анджаевихн «Селән һазрт бәәдг өрк-бүл» гидг номинацд бас диилв. Приютна районд бәәдг Мергн болн Виктория Зудбиновихн «Олн үртә өрк-бүл» гидг номинацд ончрв. Эдн долан үр асрҗана. Сарпан района элчнр Вячеслав болн Анна Панасенко «Баахн өрк-бүл» гидг номинацд нүүрт һарв. Өвкнриннь авъяс хадһлҗадг Баһ Дөрвдә района Ик Бухс селәнд бәәдг җаңһрч Манҗин Баатр Виктория авальтаһан болн һурвн көвүтәһән темдглгдснь орта. Тәвн җилдән хамдан ни-негн бәәдг элстихн Борис болн Галина Гучиновихн «Алтн өрк-бүл» болв. Цуг дииләчнр 50 миңһн арслңга сертификатар ачлгдв. Анджаевихнә өрк-бүл терүн деерән 100 миңһн арслңгар мөрәлгдв.
Сән өдрин өмн өргнд бидн Валентина Зулаевнала күүндәд, таңһчин марһанд диилвр бәрснләнь йөрәввидн. Күүкд күүнә келсәр, диилвр бәрсн йовдл эднә өрк-бүлд болн нег һазра улст ик байр-бахмҗ үүдәв. Валентина Михаил хойр дөрвн үртә, эдн хамдан хөр һар җилдән бәәнә. Герин эзн-фермер Валентина болхла селәнә сурһульд хореограф болҗ көдлҗәнә. Эднә ууһн Бадм көвүн Шарту балһснд юристин эрдм дасчана, Саша болн Милана күүкднь сурһульчнр, отхн Саяна күүкнь ода чигн бичкн. Күүкднь сурһулян сәәнәр сурч, олна җирһлд бас шунмһаһар орлцна. Үлгүрнь, Саша «Ик завср» гидг Цугәрәсән марһанд полуфиналд диилвр бәрсн төләдән «Артекд» амрв. Урднь эн «Орленок» амрлһна төвд бас одсмн. Милана сенр хот болн һуйрин зүүтә кегдлмүд болһхдан дурта. Анджаевихнә өрк-бүл селәндән тоомсрта, көдлмшч, өвкнриннь авг-бәрцәр бәәдг, төрскнч седклтә улст тоолгдна. Күүкд бичкнәсн авн герин көдлмш кедг дассмн, эдн эк-эцкдән түрүн нөкднр болна. Сул цаг учрхла эдн цуһар малын хошт эцкдән нөкд болҗ, төл авлһна, хөд кирһлһнә болн нань чигн көдлмшт орлцна. Михаил өнр-өсклң өрк-бүлд өссмн, эн тавдгч отхн үрн болна. Екатерина Бадмаевна экнь отхн көвүн-бертәһән бәәнә. Тегәд эңкр ээҗнь ачнртан нүдн-амн болҗ, чик сурһмҗ өгч, хальмг улсин авъяс, сойл зааҗ өгнә. Бернь хадм экән тевчҗ, үлгүр авч сән эк болн герин эзн күүкд күн болна.
- Эн хаврар мана районд «Дурта экм» гидг марһан болсн билә, тегәд бидн терүнд диилвр бәрсн биләвидн. Көтчнрә района һардвр мадниг амрлһна путевкар ачлв, тегәд бидн таңһчин марһанд белглсн сертификатын мөңг олзлҗ өрк-бүләрн зуульчлхар зуралҗанавидн. «Җилин сән гисн өрк-бүл» гидг марһанд бидн шүлг бичәд, видео цокҗ авад, хальмг кев-янзта хувц-хунр уюлҗ авад өрк-бүләрн белдвр кесн биләвидн. Эн марһан мана өрк-бүлиг улм батрулҗ, билг-эрдмән үзүлхд туслв. Мана өрк-бүлин күцәмҗ маднд бәәтхә, цуг элгн-саднд болн нег һазра улст бахмҗ болв. Мана таңһчд билгтә, өвкнриннь авъяс хадһлдг, өнр-өсклң, ниитә өрк-бүлмүд баһ биш. Тегәд цуг таңһчиннь нериг өөдәнәр бәрҗ Цугәрәсән марһанд орлцх зөв өгснь маднд ик даавр болҗана, – гиҗ Валентина Зулаевна келв.
Хальмг Таңһчин правительствин сүүрин залд «Җилин сән гисн өрк-бүл» гидг марһанд диилвр бәрсн өрк-бүлмүдиг байрин таалд йөрәҗ, ачлвринь бәрүлҗ өгв. Өрк-бүлин нарт-делкән Өдрин өмн эдниг йөрәснь хойр дам байрта-бахмҗта болв.

ДАВАН Наталья

Видео