Тәрлһ авх кергтә

18-05-2021, 14:00 | Таңһчин зәңгс » Зіњг

Давсн долан хонгин чилгчәр Хальмг Таңһчин правительствин ахлач Юрий Зайцев, Роспотребнадзорин таңһчар үүлддг заллтын, эрүл-менд харлһна болн социальн делгрлтин министерствин һардачнр Әрәсәд коронавирусн гем тархалһиг хөрлһнә бачм штабин сүүрт орлцв. Терүг Әрәсән вице-премьер Татьяна Голикова видеоконференц залһлдана эв-арһар давулв.
Әрәсәд, тер тоод Хальмгт, коронавирусн гемәр гемтсн улсин то баһрҗахнь темдглгдҗәнә гиҗ сүүрт келгдв. Терүнлә зерглҗ орн-нутгт эн хальдврта гемәс саглдг вакцин кеҗ һарһлһна үүлдврин кемҗән өсчәнә болн тәрлһ кедг шин пунктс секгдҗәнә. Мана таңһчд ода деерән эн гемәр гемтсн улсин 96,7 процентнь эдгв. Хальмг Таңһчин Толһач, правительств, эрүл-менд харлһна министерств болн Роспотребнадзорин региональн заллт эпидемиологическ бәәдлиг бүрткҗ, COVID-19 гемәс хөрлһнә керг-үүлдврмүд давулна. Таңһчин әмтн эн гемәс саглуллһна тәрлһ авхин төлә цуг таал тогтагдсн бәәнә. Эндр мана таңһчур 43310 вакцин авч ирв. Мана таңһчд коронавирусн гемәс 123 миңһн күн тәрлһ авхмн гиҗ зуралгдҗана. Ода деерән теднә 28 процентнь тәрлһ авв.
Хальмг Таңһчин эрүл-менд харлһна министерствин то-дигәр, мана таңһчд 20654 күн гемтв. Сүл хонгт 13 күүнд эн хальдврта гем илдкгдв. Гемтсн улсас 19972 күн цаглань эмнлһ авад эдгв. Госпитальмудт 135 күн эмнлһнд бәәнә. Гемнь күнд кевәр давҗах 10 күүнәс 7-нь ИВЛ-аппаратар кииһән авчана. Эн гемәс иштә 363 күн хорв.
Өдгә цагт мана таңһчур саглуллһна эв-арһс авч ирҗәнә. Таңһчин эмнлһсиг чирәдән өмсдг хааһулар, һаран эд-бод кедг эв-арһсар теткхмн. Тер мет буйнч седклтә улс урдк кевәрн эмнлһст дөң-тусан күргҗ, эндрк күнд цагла килмҗән тусхаҗана.

Мана зәңгч

Видео