Өрк-бүл ниитә болхла

18-05-2021, 14:05 | Таңһчин зәңгс » Зіњг

Өрк-бүлин нарт-делкән Өдр угтҗ Элстд таңһчин правительствин сүүрин залд «Җилин сән гисн өрк-бүл» гидг Цугәрәсән марһана региональн девсңд диилвр бәрсн өрк-бүлмүдиг ачлв. Байрин хургиг Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина секәд, җил ирвәс эн марһанд орлцҗах өрк-бүлмүдин то өсәд йовхиг темдглв. Эн җил һучн негн өрк-бүл билг-эрдмән үзүлҗ, күүкдиннь күцәмҗин тускар келҗ, өвкнриннь авъяс-заңшал ямр кевәр хадһлҗ йовхиг үзүлв. Эн марһан зурһан җил дарандан давулгдҗана, давсн җилд пандемийәс иштә түрүн болҗ алс зәәһин кевәр болла. Энүг Әрәсән күч-көлснә болн социальн харслтын министерств җирһлин күнд таалд туссн бичкдүдиг дөңнлһнә саңла хамдан бүрдәнә.
Эн җил марһан «Мини өрк-бүл – мини Әрәсә» гидг дуудвртаһар болв. Марһан тавн номинацар давулгдна, тегәд терүнә ашар олн үртә, селән һазрт бәәдг, баахн, өвкнриннь авъяс хадһлдг болн олн җилдән ниитә бәәдг өрк-бүлмүд йилһҗ авгдна. Региональн девсңд диилвр бәрсн өрк-бүл таңһчин нериг харсад Әрәсән марһанд цааранднь орлцх зөв авна. Темдглхәс, мана таңһчин элчнр Цугәрәсән марһанд эрк биш диилвр бәрҗ ик күцәмҗтәһәр орлцна. Таңһчин марһанд Андрюшкеевихнә, Нариншариновихнә, Чужаевихнә, Манджиевихнә болн Улановихнә өрк-бүлмүд орлцсмн. Эн җил болхла селән һазрт бәәдг өрк-бүлмүд дунд диилвр бәрсн Анджаевихн таңһчин «Җилин сән гисн өрк-бүл» гидг нер зүүв. Номинац болһнд диилвр бәрсн өрк-бүл 50 миңһн арслңга сертификатар ачлгдв. Анджаевихн болхла гран-при шүүҗ авад деерәснь 100 миңһн арслңгар мөрәлгдв.
Таңһчин социальн делгрлтин министр Өлзәтин Марина, Хальмг Таңһчин Олна палатын гешүн, марһана жюрин ахлач Балтра Александр, Хальмг Таңһчин Улсин Хуралын депутат, «Негдсн Әрәсә» партин «Бат өрк-бүл» гидг төсвин региональн зүүцүләч Бадм-Хаалһин Ольга өрк-бүлмүдиг диилвр бәрснләнь йөрәҗ, хөв-кишг, бат эрүл-менд дурдв. Марһанд орлцсн өрк-бүл болһн билгтә, седвәртә, шунлтта, ямр нег кергәр соньмсдг төләд дииләчнриг йилһҗ авхд күнд болв гиҗ эдн темдглв. Тегәд Үстин районд бәәдг Кегдышевихнә болн Хар Һазра районд бәәдг Нарановихнә өрк-бүлмүдт «Негдсн Әрәсә» партин нерн деерәс белгүд бәрүлҗ өггдв.
Көтчнрә района Ергенинский селәнд бәәдг Михаил болн Валентина Анджаевихн марһа бүрдәсн улст, жюрин гешүдт болн терүнд орлцсн өрк-бүлмүдт ханлтан өргҗ, сәәхн хальмг келәр йөрәл тәвв. Байрин хургт «Җилин сән гисн өрк-бүл» гидг марһанд орлцачнрин болн дииләчнрин туск видеофильмс үзүлгдв.
ДООҖАН Наталья
ЗУРГудТ: «Җилин сән гисн өрк-бүл» марһанд дииләчнр; Нарановихнә өрк-бүл
Авторин цоксн зургуд
Өрк-бүл ниитә болхла

Видео