Бүүрчән Канрин санлд нерәдв

18-05-2021, 14:15 | Спорт, Зіњг

Троицкое селәнә алднд бәәдг «Цагда» гидг бичкдүдин лагерьт Целинн района марһаг 13 дәкҗ диилсн Бүүрчән Канрин санлд нерәдсн шатрин дөрлдән болв. Келхд, марһана мөңгнә саң нурһлҗдан Орн-нутгин Хүүвин депутат Адучин Баторин нилчәр тогтагдв.
Дөрлдәг нүр үгәр секхләрн, Бүүрчән Канриг сәәнәр меддг биләв, яһад гихлә бидн терүнлә Баһ Чонса әәмгин нег һазра улс гив. Адучин Баторин келсәр, Бүүрчән Канр Сиврт шатрар соньмсад, наснаннь туршарт шатр наадҗ йовсмн. Тууврт Барнаул балһснд тусад, тенд кесг дәкҗ олн зүсн марһанд диилвр бәрсн болдг.
Дарунь Сиврәс төрскн һазрурн нүүҗ ирәд, Целинн райондан марһас дәкнәс босхасмн, тер шатрин дөрлдән ода күртл давулгдна. Бүүрчән Канр эн марһанд 13 дәкҗ диилсмн. Ода нег чигн күн эн күцәмҗ бәрәд уга гиҗ Адучин Батор онц темдглв.
Дарунь Батор Канурович таңһчин селәнә эдл-ахун халхд ик тәвцән орулснднь Орн-нутгин Хүүвин АПК-н Комитетин болн Орн-нутгин депутатын Күндллһнә һашгуд Манҗин Константинд, Павла Станиславд, Бембин Константинд, Манҗин Киштәнд бәрүлҗ өгв. Нег үлү бүлән үгән депутат Манҗин Киштәнд нерәдв, яһад гихлә энүнә өрк-бүллә Адучиевихн Аршан Булг селәнд хам-хоша бәәсмн. «Тиигхд Киштән аак хөд кирһлһнә көдлмшт җил болһн шунмһаһар орлцад, өөдән күцәмҗ бәрдг билә. Өдр болһн эн күүкд күн 100 шаху хө кирһдг бәәсмн», – гиҗ депутат тодлврарн хувалцв.
Троицкое СМО-н ахлач Бүүрчән Санл Бүүрчән Канр мини авһ билә, гиҗ үгән эклв. Түүнә келсәр, авһнь төрскнч, эврәннь улстан, теегтән дурта күн бәәсмн. Альд эс бәәввчн, йоввчн даңгин хальмгар күүндәд бәәтн гисн селвгнь ода күртл чееҗдм бәәһә гиҗ Санл Петрович келв. Тегәд авһиннь санлд нерәдсн марһанд цуглрад, төрскн келәрн күүндснь төләднь цугтаднь ик гидг ханлтан өргҗәхән эн медүлв.
«Би Бүүрчән Канриг Сиврәс төрскнүрн ирснәс авн меддг биләв. Хамдан шатр наадад, сул цаган давулад, өрк-бүләрн үүрлҗ йовлав», - гиҗ Хальмг Таңһчин марһанд 15 дәкҗ диилсн шатрч Манцна Бадм келв. Эн Сиврәс ирн Целинн районд бәәһәд Бүүрчән Канрла таньлдсн болдг. Давсн зун җилин 50-ч җилмүдин чилгчәр – 60-ч җилмүдин эклцәр Целинн районд күчтә гидг шатрин команд бәәсмн. Бүүрчән Канр, Манцна Бадм, Бадмин Антон ахта таңһчин марһаг кесг дәкҗ шүүдг бәәсмн. Нам Элст балһсн чигн Целинн районла әдлцҗ чаддго билә. Манцна Бадмин келсәр, Бүүрчән Канр теднәс насарн невчкн ах билә, тегәд цугтан терүг бааҗа гиҗ дууддмн.
Манцна Бадм наадан төгсәҗәхән, яһад гихлә нүдм юм үзҗәхш, гиҗ келв. Тегәд чигн нанд диилгдсн шатрчнрас гемән сурҗанав, намаг диилсн улст ханлтан өргҗәнәв гив.
Цааранднь түргн шатрар марһан эклв. Терүнд 50-тә болн 50-әс үлү наста 30 күн орлцв. Эдн хоорндан долан наад наадв. Аштнь 6 очко авсн 66-та Шамакан Анатолий диилвр бәрв. Түүнәс арднь өрәл очкод хоцрсн 60-тә Булгтан Вячеслав (хоюрн – Элст балһсн) болн 63-та Василин Саңһҗ-Һәрә (Лагань балһсн) хойрдгч болн һурвдгч ормс эзлв. Теднд кубокуд болн Күндллһнә һашгуд бәрүлҗ өгв. Мөңгнә мөрәһәр орлцач болһн ачлгдв.
Бүүрчән Канрин санлд нәрәдсн марһан җил болһн давулгдхмн гиҗ Адучин Батор зәңглв.
ШААКУН Василий

Видео