Тәрлһ авхар иртн!

22-05-2021, 15:00 | Таңһчин зәңгс » Зіњг

Эн амрлһна өдрт, хөн сарин 23-д, коронавирусн гемәс саглуллһна тәрлһ авх улсин төлә хотл балһсна 7-ч микрорайонд «Белый лотос» лавкин өөр 12 часас авн 18 час күртл мобильн комплекс көдлхмн. Тегәд тәрлһ авх саната улс тиигәрән ирҗ чадҗана. Ирх долан хонгас авн Элстд коронавирусн гемәс саглуллһна тәрлһ кедг мобильн комплекс үүлддгән уурчана. Хөн сарин 24-әс авн тәрлһиг зуг стационарн пунктд кеҗ болхмн. Элст балһсна поликлиникд, 1-ч болн 6-ч микрорайодт, Троицкое селәнд үүлддг әңгүд тәрлһ кедг болхмн.
Таңһчин эрүл-менд харлһна министерствин то-дигәр, сүл хонгт дәкәд 13 күн эн хальдврта гемәр гемтснь илдкгдв. Тиигәд, пандемий эклснәс авн мана таңһчд 20706 күн гемтв. Хәрнь, 20032 күн эдгсн бәәнә. Ода таңһчин госпитальмудт 147 күн эмнлһ авчана. Теднәснь 10 күн күнд кевәр гемнҗәнә, тер тоод 4-нь ИВЛ-аппаратар кииһән авчана. Гемнь невчк гиигн кевәр давҗах 202 күн гертән эмнлһ авчана, эмчнр эднә эрүл-мендин бәәдлиг бүрткҗ оньгтан бәрҗәнә.
Санитарн-эпидемиологическ бәәдл невчк ясрҗадг болв чигн таңһчин эрүл-менд харлһна бүрдәцст саглуллһна некврмүд эрк биш күцәгдҗәнә. Шидр «Әмд» гидг буйнч седклин саң болн өр-өвч седклтә нег һазра улс Городовиковск района эмнлһнд хальдврта гемәс саглуллһна кегдлмүд илгәв. Тиигәд, эднд чирәдән өмсдг 20000 хааһул, 1000 респиратор болн нань чигн тоот бәрүлҗ өгв. Района эмнлһнә көдләчнр буйнч седклтә улст ик ханлтан өргҗәнә.
БАТАН Сәәхлә

Видео