Поштын көдләчнрт велосипед белглв

22-05-2021, 15:08 | Таңһчин зәңгс » Зіњг

Хөн сарин амрлһна өдрмүдин хөөн эклсн долан хонгт Яшкуль селәнә поштын көдләчнрин төлә байрта йовдл учрв. Эднд «Аст-Маркет» лавкас ирсн илгәцд хойр велосипед бәәснь медгдв. «PHOENIX» гидг тамһта велосипед эднд илгәсн күн эврәннь нерән медүлсн уга.
Поштын көдләчнр тиим белг авсндан теңкән уга байрлв, юңгад гихлә селәнә уульнцсар барин һарцсиг йовһар күргхд күнд болна. Селәнә хол уульнцсиг теткдг көдләчнр Нүдлчин Светланад болн Федора Владимирт велосипедмүд өгх кергтә гиҗ үүрмүднь шиидв. Олн җилдән селәнә поштд көдлҗәх көдләчнр иим белг авсндан ханлтан өргәд, ода хол уульнцст күрхд амр болх гиҗ темдглв.
Хөн сарин 12-ас авн Үрс Сар эклсн бәәнә. Эн әрүн чинртә сарин туршарт күцәсн буйнч седклтә керг-үүлдвр зун миңһн дәкҗ икдҗ, буй хуралһнд туслна гиҗ тоолгдна. Тегәд Яшкуль селәнә поштын көдләчнрт цаһан седкләсн белг белглсн күн өглһнә эзн болҗ, ут нас наслҗ эрүл-менд бәәтхә! Поштын көдләчнр өрүн болһн барин һарцсиг күргхәр велосипед унҗ һарад йовхларн тер күүг тодлҗ, хөв-кишг терүнд дурдна.
Мана зәңгч

Видео