Кергтә кегдлмүдәр теткв

25-05-2021, 16:10 | Таңһчин зәңгс » Зіњг

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, хөн сарин 1-д кесн то-дигәр реабилитацин техническ кегдлмүдиг цаг зуур олзллһнд өгдг пунктд 120 күн ирв. Ут тоодан эднд 163 техническ эв-арһ йилһҗ өггдв.

Реабилитацин техническ кегдлмүдиг цаг зуур олзллһнд өгдг пунктс район болһнд болн Элстд үүлддг таңһчин әмтнә социальн теткврин комплексн төвин (КЦСОН) улд бәәнә. Тренажермуд, тайгуд, күнд гемтә улсин төлә орндгин өлг-эд, гемтә-шалтгта улсин тергд, бийән теткҗ чаддго медәтнрт кергтә нань чигн кегдлмүд эн пунктст бәәнә. Реабилитацин кегдлмүдиг элгн-садан удан цагтан хәләҗәх улс бас авч чадҗана.
2020-ч җилд таңһчин бюджетәс йилһгдсн 563,6 миңһн арслңгар 240 һар техническ кегдл хулдҗ авгдв. «Демографь» гидг келн-улсин төсвин медлд «Ах үй» гидг региональн төсвин халхар эн пунктс секгдсмн. Эн төсв 2019-ч җилд эклв, тер цагас авн 896 реабилитацин техническ кегдл хулдҗ авгдв. Тер мет 140 күн медәтнриг болн гемтә-шалтгта улсиг хәләҗ асрхин туст «Хәләврин сурһуль» гидг шишлң сурһуль сурв.
«Ах үй» гидг региональн төсвин медлд райодын болн Элстд бәәдг комплексн төвмүдин улд медәтә болн гемтә-шалтгта улсиг асрлһна болн реабилитацин сурһуль үүлднә. Эн төсв эклснәс авн «Хәләврин сурһульд» 359 лекц болн дамшлтын кичәл давулгдв. Терүнд ут тоодан 1540 күн бийән асрҗ чаддго ах үйин болн эрмдгтә улст дөң күрглһнә туст сурһуль сурв. Кичәлд эдниг реабилитацин техническ кегдлмүд олзлдгиг дасхна, медәтнриг болн эрмдгтә улсиг гер деернь сәәнәр хәләхин туст сүв-селвг өгнә.
Одахн тиим кичәлмүд таңһчин әмтнә социальн теткврин комплексн төвин улд болв. Социальн болн эрүл-менд харлһна көдләчнр Әрәсән Улан Кирсин көтлврәр шишлң сурһуль сурв.
ДООҖАН Наталья

Видео