Нертә улсин мөрәсәр ачлгдв

25-05-2021, 16:22 | Таңһчин зәңгс » Зіњг

Давсн Бемб өдрлә таңһчин дунд сурһулин цуг бүрдәцст сүл хонх җиңнв. Көтчнрә района Алцңһуд селәнә Рокчинскийин Һәрән нертә дунд сурһульд ончта йовдл учрв. Эн хотнд төрсн, Хальмгин нер дуудулҗ йовсн зурач Рокчинскийин Һәрән болн шүлгч Бадмин Серәтрин нертә мөрәсәр түрүн болҗ сурһульчнр болн багш ачлгдв. Нер һарсн эн улсин элгн-саднь эн хойр мөрә үүдәҗ, хальмг сойл-кел делгрүллһнд темдгтә тәвцән орулҗадг сурһульчнриг болн эдниг сурһҗадг багшнриг ачлхар шиидв. Зурач Рокчинскийин Һәрән нертә мөрәһәр тууҗин багш Муучкан Гилән болн йилһән сәәнәр сурдг тавн сурһульч: Михайлинован Нарана, Очра Бадм, Көктшә Александра, Николаевин Эрдени болн Сарңга Цаһан ачлгдв. Немәд келхәс, зурачин элгн-саднь Гарри Олеговичин нертә хора секхин төлә школд дем бәрүлв. Шүлгч Бадмин Серәтрин нертә мөрәһәр хальмг кел даслһна халхар күцәмҗ бәрсн сурһульчнр Һәрән Бадмд, Доткин Цаһанд болн Бамбан Гернзлд шишлң мөрә бәрүлҗ өггдв.
Онц темдглхд, зурач Рокчинскийин Һәрә болн шүлгч Бадмин Серәтр бөлнр бәәсмн. Хойр билгтын элгн-саднаннь нерн деерәс Алцңһудт бәәдг Һәрән Сергей болн Доткин Мария мөрәсәр ачлгдсн лауреатнриг әрүн седкләсн йөрәв. Эдн цугтан сурһулян сәәнәр төгсәҗ, төрскн һазр-уснаннь нер дуудулҗ йовтха гиҗ элгн-саднь кен-негнднь хамг сән-сәәхн тоот дурдв.

КАРСАНА Евгения

Видео