Көк теңгсин балһсиг кеерүлхин төлә

27-05-2021, 09:37 | Таңһчин зәңгс » Зіњг

Урҗ өдр Хальмг Таңһчин правительствин Ахлачин дарук Күүкән Нарна һардврт «Балһснд сән кец-таал тогталһн» гидг федеральн төсв күцәлһиг тетклһнә ведомствс хоорндк комиссин дарани сүүр болв. Терүнд Лаганя муниципальн бүрдәц балһснд кец-таал тогталһна сән гисн төсвсин Цугәрәсән марһанд эрлһ оруллһна төр хәләгдв. Эн марһаг Әрәсән тосхлтын министерств давулна. Темдглхәс, эн марһанд урднь Городовиковск балһсн орлцад, эврәннь төсвиг бәәдл-җирһлд тохрахин төлә 40 сай арслң авсмн.

Лаганя ГМО-н толһач Очра Геннадий балһснд сән кец-таал тогталһна төсвин тускар келҗ өгәд, күцәгдх керг-үүлдврмүдин болн тосхгдх объектсин тускар зәңглв. Урднь Лагань балһснд стадион бәәсн һазрт сән таал тогтагдхмн гиҗ зуралгдҗала. Эн марһанд диилвр бәрсн цагт федеральн бюджетәс 45 сай арслң йилһгдхмн, деернь таңһчин болн бәәрн бюджетмүдәс хойр дундур сай арслң йилһгдх зөвтә. Тиигәд, балһсна һардврин толһачин келсәр, энд бичкдүдин, спортивн олн-зүсн керг-үүлдвр, яарм давулхин төлә сән таал тогтагдхмн. Эн төсв күцәгдснә ашт дундлад 60 шин көдлмшч орм бүрдәгдхмн, бәәрн арһлачнр үүлдврән делгрүлҗ чадхмн гив.
Болв Цугәрәсән марһанд диилвр бәрхин төлә төсвиг сәәнәр белдх, бәәрн һазрин онцинь олзлх кергтә гиҗ вице-премьер келв. Тиигәд, сән таал тогтагдх һазр Көк теңгсин көвәд бәәдг учрар терүг олзлҗ өвәрц болн ке-сәәхн төсв белдх кергтә, гиҗ Наран Геннадьевич темдглв. Цугәрәсән марһанд эрлһән орулхин төлә мөчн сарин 1 шин күртл сүүрт орулгдсн сүв-селвгүдиг учртан авч чиклх кергтә. Лаганя районд бадм цецгүд урһдгиг учртан авч, Көк теңгсин көвәд әмтн сергмҗтәһәр амрч чадхиг олзлҗ үзмҗтә төсв белдх кергтә гиҗ сүүрин ашар шиидвр авгдв. Тегәд эн төсвин зура белдсн мергҗлтнрлә балһсна болн района һардвр хамдан эн төриг хаһлх зөвтә гисн неквр тәвгдв.
Сүүрт Әрәсән Өмн үзгин федеральн округд РФ-н Президентин күцц зөвтә элч Александр Беляев, таңһчин ЖКХ-н болн энергетикин министрин үүл дааҗадг Мангута Виктория, ОНФ-н региональн штабин ахлач Мергульчин Баатр, таңһчин ах архитектор Ашката Галина хәләгдсн төрәр ухан-тоолврарн хувалцҗ, төсвиг ясруллһна туст сүв-селвгән орулв.
– Цугәрәсән марһанд мана таңһчд орлцҗ Городовиковск балһсн диилвр бәрсн дамшлт бәәнә. Шидр Хальмг Таңһчин Толһач Хаска Бату Әрәсән тосхлтын министр Ирек Файзуллинла харһҗ күүндсн билә. Бидн федеральн министерствлә нөкцҗ күцәмҗтәһәр үүлдҗәнәвидн. Лагань балһсн федеральн көтлврмүдт шунмһаһар орлцҗ сән таал тогталһна туст аһу ик көдлмш күцәҗәнә. Тегәд эн марһанд диилвр бәрҗ Көк теңгсин көвәд бәәдг балһсиг улм кеерүлҗ әмтнә төлә сән таал тогтах зөвтәвидн, – гиҗ Нарн Геннадьевич товчлҗ келв.

БАТАН Наталья

Видео