Хальмгт хаалһс ясгдхмн

29-05-2021, 15:05 | Таңһчин зәңгс » Зіњг

Шидр Әрәсән федеральн хаалһин агентствин һардач Роман Новиковин һардврт болсн селвлцәнд көлгн-күчнә хаалһин тосхлт делгрүллһнә көдлмшин һурвн җилә көтлвр тогталһна болн күцәлһнә төр хәләгдв.

Эн көтлврт Хальмгин долан хаалһ орв. Эннь Элст-Арзгир-Минеральные Воды, Яшкуль-Комсомольский-Артезиан, Георгиевск-Буденновск-Улан Хол, Улан Хол-Лагань, аэропорт күртл хаалһ, Комсомольскийин хаҗудк хаалһ болн Элст-Ремонтное хаалһс болна. Темдглхәс, мана таңһчд хаалһс ясруллһна туст нань чигн талдан көтлврмүд күцәгдҗәнә, тер тоод «Әәмшг уга болн сән чинртә хаалһс» гидг келн-улсин төсв мөн.
Хальмг Таңһчин Толһач Хаска Батун темдглсәр, 1138 дууна хаалһ ик чинртә хаалһс болад, хамгин түрүнд делгрҗ ясгдхмн. Һурвн җилин эргцд бидн Хальмгт хаалһсин 85 процентинь некврлә ирлцүлҗ, сән таал тогтахар зуралҗанавидн. Федеральн хаалһин агентств болн таңһчин правительств хоорнд бооцан батлгдх зөвтә, гиҗ таңһчин Толһач келв.
Тер мет Хальмгин хаалһин эдл-ахун үүлдврин көтлврт нурҗадг дөрвн тагтын бат ясвр кегдхмн. Таңһчин Толһачин темдглсәр, цуг эн көдлмш таңһчин әмтнә җирһлин кемҗә өөдлүллһнд туслхмн.
Селвлцәнд Хальмг Таңһчин правительствин Ахлачин дарук Күүкән Нарн, таңһчин тосхлтын, хаалһин болн көлгн-күчнә министр Җанҗин Виктор, терүнә дарук Валетан Санл болн хаалһин эдл-ахун әңгин һардач Мелетьеван Киштә орлцв.

Мана зәңгч

Видео