Кандидатнрин тоод шин нерд дала

01-06-2021, 15:38 | Таңһчин зәңгс » Зіњг

Хөн сарин 30-д мана таңһчд цуг Әрәсәд мет “Негдсн Əрәсә” партин кандидатнрин төлә урдаснь бүрдәгдсн суңһвр болв.

Келхд, партин Хальмг региональн әңг дааврта эн керг-үүлдврт тохнятаһар белдсмн. Урдаснь Интернетд болн мана газетд таңһчин суңһврин участкудын хайг, телефон, ямаран цагла суңһвр болхин туск зәңг барлгдсмн. Участок болһн коронавирусас харслһна эв-арһсар теткгдлә.
Давсн Бемб өдрлә мана таңһчд дигтә 8 часла өрүһәр 50 суңһврин участк көдлмшән эклв. Хамгин түрүн суңһачнрин тоод урдк кевәрн мана ветеранмуд билә. Теднә дунд Лагань балһснд партин кандидатнрин төлә дууһан өгсн Очра Авдотья бәәсмн. Авдотья Цагановна партин Лаганя әңгин дамшлтта гешүн, бәәрн әмтн дунд тоомсрта күн мөн. Медәтә эн күүкд күн дууһан өгчкәд, иигҗ келв: «Би ода партин шунмһа гешүдиг дөңнүв. Тедн цугтан баһ наста, сурһульта, төрскнч улс мөн. Мини тоолврар, теднә күчәр мана таңһч улм делгрҗ йовхнь маһд уга. Мана суңһврин участкин көдлмшин тускар келхлә, комиссин гешүд даалһсн үүлән сәәнәр күцәҗәнә, суңһачнрт COVID-19 гемәс харслһна эр-арһс өггдв, участкин көдлмш дигтә-дарата болҗ нанд медгдв. Эннь намаг байрлулҗана».
Тер өдрәр арвн часин алднд Элстд А. Амр-Санана нертә Келн-улсин дегтрин саңд бәәршлсн участкд дууһан өгхәр партин Хальмг региональн әңгин сегләтр, Хальмг Таңһчин Хуралын Ахлач Анатолий Козачко ирв. Эврәннь иргнә даавран күцәчкәд эн тоолврарн хувалцв: «Эндр бидн эврәннь иргнә болн партин даавран күцәҗәнәвидн. Нанд зәңглсәр, таңһчд электронн эв-арһар 4500 күн дууһан өгчксн бәәнә. Суңһврин участкуд 20 час күртл көдлхмн. Энүнәс иштә мана таңһч электронн эв-арһар сәәнәр дууhан өгчәхнь маһд уга, гиҗ келҗ болхмн. Суңһврин йовуд намаг байрлулҗана, яһад гихлә участкудт көдлмш заканла ирлцәтәһәр давҗана.
Хальмг кандидатнрин тускар келхлә, тедн цугтан күндтә, сурһульта, нурһлҗ баһ наста улс. Ик зунь тедн шин улс, энүг онц темдглҗәнәв».
Партин кандидатнрас негнь Кальдинә Виталий бас маднла суңһврин тускар ухан-тоолврарн хувалцв. Терүнә келсәр, парть йир даавртаһар суңһврт белдсмн, спискд орулгдсн кандидатнр дала, тегәд суңһач болһн тааста кандидатнриг шүүҗ авх арһта бәәснь маһд уга.
Тер өдрин бийднь таңһчд өрүн 10 часла 10 миңһн күн дууһан өгчксн билә. Таңһчд болн орн-нутгт болсн суңһврин то-диг мана газетд даруһас барлгдхмн.
Партин зергләнәс Орн-нутгин Хүүвин суңһврт орлцх улсин нерд мөчн сарин 19-д Москва балһснд болх партин съездд батлгдхмн.
Мана зәңгч

Видео