Хаалһсиг ясхар

10-06-2021, 09:56 | Таңһчин зәңгс » Зіњг

Хальмг Таңһчин тосхлтын, көлгн-күчнә болн хаалһин эдл-ахун министрин дарук Валета Санл Ик Буурла района муниципальн бүрдәцин толһач Бадмин Вячеславла болн «Ик Буурла РМО-н Сельдорсервис» гидг МУП-ин һардач Авалдыка Эрдньла харһв. Эдн района хаалһс яслһнд болн тосхлтд йилһгдсн мөңгиг тустаһар олзллһна, Элст-Ик Буурл-Чолун Хамр хоорнд региональн чинртә хаалһд сән таал тогталһна көдлмш күцәлһнә тускар күүндв.

Тер мет долан хонг болһн давулгддг хаалһсин чинр шинҗллһнә төгсв. Элст-Арзгир-Минеральные Воды хаалһин 28-ч дууна һазрас авн 43 дун күртл әәмшгтә нүкд уга кегдсиг министерствин ах мергҗлт Ивана Сергей герчлв. Удл уга эн участкд хату девскртә хаалһ шинәс тосхгдхмн. «Әәмшг уга болн сән чинртә хаалһс» гидг келн-улсин төсвәр 2024-ч җил күртл Элст-Арзгир-Минеральные Воды региональн чинртә хаалһд 76,8 дууна һазрт ясвр кегдхмн. 2021-ч җиләс авн 2024-ч җил күртл 48,8 дууна һазрт хаалһ ясгдхмн.
Олн җилдән хаалһс эс ясгдсна учрар Көтчнр-Иҗл-Соленое Займище хоорнд бәәдг хаалһ нурв, Садовое-Кануково-Салын Тугтн болн Яшлт-Сальск хоорднк хаалһсин хату девскр эвдрв. Тегәд Яшлт-Сальск хоорнд бәәдг хаалһиг 2024-ч җилд ясх гиҗ зуралгдсн цаг-болзгиг чикләд, 2022-ч җилд энд ясвр күцәх шиидвр авгдв.
Министрин дарук эн өдрмүдт «Стройконтроль» ООО-н элч Буван Баатрла хамдан Яшкуль-Комсомольский-Артезиан болн Улан Хол-Лагань хоорнд хаалһст күцәгдҗәх ясврин көдлмшин чинриг бүрткв. Яшкулин 2-ч тойгта ДУ Яшкуль-Комсомольский-Артезиан хоорнд региональн чинртә хаалһ яслһна көдлмш күцәв. Арһлач Михаил Богатовин предприять Улан Хол-Лагань хоорнд бәәдг хаалһиг яслһна көдлмшиг дуусв, эдн 8,7 дууна һазрт хаалһд хату девскр шинрүлв.
Мана зәңгч

Видео