Социальн объектс тосхгдхмн

10-06-2021, 09:59 | Таңһчин зәңгс » Зіњг

Социальн көдләчин Өдр угтҗ Хальмг Таңһчин социальн делгрлтин, күч-көлснә болн көдлмшәр тетклһнә министр олнд зәңгллһнә эв-арһсин көдләчнрлә харһсн билә. Дааврта һардач «Демографь» гидг келн-улсин төсвин медлд күцәгдҗәх керг-үүлдврмүдин тускар тодрхаһар келв. Тиигәд эн келн-улсин төсвин «Ах үй» гидг федеральн көтлврәр 2020-ч җилд Целинн районд медәтнрин болн гемтә-шалтгта улсин гер-интернатын шин бәәрин тосхлт эклв.

– Өдгә цагт тенд 1-ч давхрт тосхлтын-монтажн көдлмш күцәгдсн бәәнә, 2-ч давхрин эрсмүдиг экләд тосхҗана. Эн объект җилин чилгчәр эдлврт орулгдхмн гиҗ зуралгдҗана. Шин гер-интернатын төсвәр тенд өдгә цага сән таал тогтагдхмн. Медәтнр болн эрмдгтә улс хойр болн һурвн ормта хораст бәәхмн. Тенд эмнлһ келһнә болн реабилитацин шишлң хорас секгдхмн. Сурһулин болн тааста керг күцәлһнә, сойлын керг-үүлдврмүд давуллһна кабинетмүд бәәхмн. Тер мет эн бүрдәц өдгә цага технологическ, медицинск болн реабилитационн физиотерапевтическ кергсләр теткгдхмн. Терүг олзлҗ медәтә болн гемтә-шалтгта улст сән чинртә туслмҗ күргҗ болхмн. Тосхлтын йовудыг бидн чаңһар бүрткҗ, ямр нег дуту-дунд илдкгдхлә дарунь терүг ясх неквр тәвнәвидн, – гиҗ Марина Петровна темдглв.
Таңһчин район болһнд болн хотл балһснд ода комплексн төв үүлднә. Тенд медәтнрт, һанцарн бәәдг улст, җирһлин таалд туссн олн үртә өрк-бүлмүдт социальн, медицинск, психологическ болн нань туслмҗ күргнә. Район болһнд мобильн бригад бүрдәгдсн бәәнә, реабилитацин техническ эв-арһсин пунктс секгдв. «Демографь» гидг келн-улсин төсвәр тедниг шишлң көлгн-күчәр теткв, тегәд хол селәдт күрдг арһ учрв. Элстд комплексн төвин улд «Социальн такси», «Гер деер санаторь», эрүл-мендин клуб үүлднә. Медәтнр өдгә цагин некврлә ирлцхин төлә компьютер олзлдг эв-арһ дасна. Тегәд ах үйин улст болн олн үртә өрк-бүлмүдт сән чинртә туслмҗ күргхин, эднә билг-эрдм делгрүлхин, эрүл-мендинь батрулхин төлә шин бәәр тосхх кергтә болҗана.
Эн җил Элстд таңһчин әмтнә социальн теткврин комплексн төвин шин бәәр экләд тосххмн. Эн объектиг 2022-ч җилин түрүн өрәлд эдлврт орулх зура бәәнә. Хальмг Таңһчин социальн-экономическ делгрлтин көтлврин медлд эн җил гемтә-шалтгта бичкдүдин реабилитацин төвин шин бәәр болн Элстин медәтнрин болн эрмдгтә улсин интернатын төлә 200 ормта шин гер тосхлһна төсвин-һаруһин бәрмт цаасн белдгдхмн.
БАТАН Сәәхлә

Видео