Малын эмчнрин үүлдвриг үнлв

17-06-2021, 15:32 | Таңһчин зәңгс » Зіњг

Шидр Хальмг Таңһчин Толһач Хаска Бату таңһчин ветеринарийин заллтын һардач Санҗин Викторла харһв. Таңһчд тогтсн эпизоотическ бәәдлин, ветеринарийин цергллтин үүлдврин тускар харһлтд келгдв.

- Сүл хойр җилин эргцд таңһчин ветеринарийин цергллт му биш күцәмҗ бәрҗ үүлдҗәнә. Терүнә ашт эдн Әрәсән Өмн үзгин болн Ар Кавказин федеральн округудт сән гисн цергллтсин тоод орв. Федеральн цергллт таңһчин заллтд йилһгдсн мөңгн олзта-тустаһар олзлгдсиг, баахн мергҗлтнриг белдлһнә төр хаһлгдҗахиг, олн-зүсн хальдврта гем цаглань илдкҗ терүнәс хөрлһнә керг-үүлдврмүд күцәгдҗәхиг темдглнә. Тер мет материальн-техническ ул батруллһна, ветеринарийин лабораторьмудт бат ясвр келһнә, өдгә цага кергсл хулдҗ авлһна туст аһу ик көдлмш күцәгдв. Тиигәд, шин рентген-кабинет секгдв, УЗИ углҗ тәвгдв. Хальмг Таңһч давсн җиләс авн эклсн регионализацин кергиг күцәмҗтәһәр күцәв. Ода бидн малыг талдан регионмудт зөөҗ болн хальмг махиг экспортд йовулҗ чадҗанавидн. Болв зәрм фермермүд малын эмчнрин зәрм туслмҗиг өргәр олзлхш. Эдн онц дааврин тускар мартх зөв уга, юңгад гихлә эднә кеҗ һарһдг эдл-ууш таңһчин нериг һарһна, - гиҗ Бату Сергеевич темдглв.
Эзн уга үлдсн герин малын (мис, нохас) төлә хорһдл тосхлһна төр харһлтд бас босхгдв. Эн җилин чилгч күртл төсвин-һаруһин документац белдгдхмн, терүнд таңһчин бюджетәс мөңгн йилһгдв. Эн хорһдл өдгә цага, цуг некврлә ирлцдг болхмн.
Мана зәңгч

Видео