Эрмдгтә улсиг дөңнхәр

19-06-2021, 16:13 | Таңһчин зәңгс » Зіњг

Урҗ өдр Хальмг Таңһчин Толһачин медлд үүлддг гемтә-шалтгта улсин хүүвин дарани сүүр болв. Терүг таңһчин Толһачин һардврин ахлачин дарук- таңһчин Улсин Хуралд (Парламентд) Толһачин элч Манҗин Араш һардҗ давулв. Сүүрт эрмдгтә улст эрүл-мендин халхар болн санитарн түрүн дөң күргсн цагт эмәр тетклһн болн гемтә-шалтгта улс бәәдг гер-бүүрт сән таал тогталһна төрмүд хәләгдв. Тер мет эрмдгтә улсин Цугәрәсән ниицәнә (ВОИ) Хальмг Таңһчд үүлддг региональн әңгин болн «Теңгрин әдстә» олна бүрдәцин үүлдврин тускар келгдв.

Хальмг Таңһчин эрүл-менд харлһна министрин негдгч дарук Динкин Галинан зәңглсәр, 2021-ч җилд гемтә-шалтгта улсиг эмәр тетклһнд федеральн бюджетәс 87588,5 миңһн арслң йилһгдхмн. Җилин эклцәр кесн то-дигәр, мана таңһчд социальн туслмҗ күрглһнә халхар 5601 күн өңгәр эмәр теткгдх зөвтә. Эннь таңһчд бәәдг льготникүдин тооһас 20 процент тогтана. Ода деерән 19337 рецепт бичүлҗ өггдсн бәәнә. Льготникүдиг эмәр тетклһнд 35 637,1 миңһн арслң һарһгдв.
Элстин һардврин толһачин дарук Васькина Галина хотл балһсна олн патьрта гермүдт бәәдг гемтә-шалтгта улсин эрлһәр сән таал тогталһна төр хаһлгдна. Болв балһснд бәәдг гермүдин ик зунь хуучн, тегәд тенд пандус тосхлһн зөвәр нәрн болна. 2010-ч җиләс авн эдлврт орулгдҗах гермүдт эрмдгтә улсин төлә шишлң таал тогталһна неквр күцәгдх зөвтә. Тегәд гемтә-шалтгта улсин олна бүрдәцсин элчнр шин объектс тосхгдсн цагт бүртклһнә керг-үүлдврмүдт орлцҗ, цугнь некврлә ирлцәтәһәр күцәгдхиг шинҗлнә. Җилд хотл балһсна һардврин хайгар тавн-зурһан эрлһн шалтгта улсас орҗ ирнә гиҗ Галина Васильевна зәңглв. Һардврин медлд шишлң комиссь үүлднә, тегәд гемтә-шалтгта улсин төлә сән таал тогталһна төр хаһлгдна.
ВОИ-н КРО-н ахлач Валерий Решетников болн «Теңгрин әдстә» гидг олна бүрдәцин элч Эрднин Буйнта үүлдвриннь тускар тооцаһан өгв. Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина болн сүүрт орлцсн гемтә-шалтгта улсин олна ниицәсин элчнр «Теңгрин әдстә» гидг бүрдәцин үүлдвриг өөдәнәр үнлв. Эдн социальн туслмҗ күрглһнә тоод орҗ, аутистическ гемтә бичкдүдт дөңгән күргнә. Шүүҗ авсн грантын мөңгәр эдн иим гемтә бичкдүдин реабилитац давулдг мергҗлтнриг белдв. Харм төрхд, эрмдгтә улсин Цугәрәсән ниицәнә региональн әңгин үүлдврин туст зәрм сурв учрв. Тегәд таңһчд үүлддг гемтә-шалтгта улсин олна ниицәсин элчнр цуһар цуглрҗ, үүлдврән хамцуллһна төр хаһлх болв.
Сүүрин көдлмшт Хальмг Таңһчин правительствин Ахлачин дарук Ивана Светлана орлцв. Эрмдгтә улсин олна бүрдәцсин элчнр хәләгдсн төрмүдәр ухан-тоолврарн хувалцҗ, зәрм төрмүдәр сүв-селвгән орулв.
ДООҖАН Наталья

Видео