Һаза дегд халун болҗана

29-06-2021, 16:42 | Таңһчин зәңгс » Зіњг

2017-ч җилин зуни кемлә телеүзләр «Әрәсән хамгин халун гисн селән» гидг соңсхвриг мана орн-нутгин телехәләһәчнр үзснь маһд уга. Түүнд Хальмг Таңһчин Утта селәнәс кесн репортажд хальмг халуна тускар күүндвр болла. Үлгүрнь, соңсхврт Хальмг Таңһч Әрәсән хамгин халун гисн регионд тоолгдҗана, болв таңһчд хамгин халун ямр селән гихлә Утта мөн, тенд ямаран чигн усна тогтал уга, аһарин кемҗән нарнд өдртнь 60 градуст, сүүдрт болхла 45 градуст күрнә гиҗ зәңглгдҗәлә. «Эн шачах нарнд әмтн яһҗ бәәнә, ямр тесмһә улсв эдн?», – гиҗ соңсхврин түүрвәч алң болҗала.
Болв бидн, Хальмгт бәәдг әмтн, алң болдговидн, яһад гихлә халун зун мана төлә дасҗ одсн юмн, бидн шатчах һаң халунд иҗлдҗ одсн улсвидн. Ода дәкнәс мана теегүр әвртә халун ирв, һаза аһарин кемҗән 40 һар градусас үлү болсн деерән салькн көдләд элснә шуурһн шуурв. Урдаснь кесн синоптикүдин тааврар, иим теңгрин бәәдл кирцхд така сарин эклц күртл хадһлгдхмн.
Эн учрар мана таңһчд түрүн болҗ дунд сурһуль төгсәсн баһчудын нәр һаза давсмн, түүнд дала әмтн орлцсн уга. 9-ч болн 11-ч классмудын сурһульчнрин эк-эцкнр халунас болн коронавирусас көлтә зуг байрин бәәдлд аттестатмуд бәрүлҗ өглһнд орлцсмн.
Тегәд чигн ода әмтн нурһлҗдан теңгрин бәәдлин тускар күр кенә. Ташр әмтнә ик зунь яһад сүл җилмүдт халун күч авад бәәдмн, урднь тиим догшн халун уга биләлм гиҗ өврнә. Миниһәр болхла, урднь мадниг урһа модд харсдг бәәсмн. Давсн зун җилин 50-60-ч җилмүдт Элст балһсна эргнд элс зогсахин төлә модд олар тәрдг бәәсмн. Болв дарук җилмүдт эн туст мөңгн йилһдгән уурснас көлтә тер модд нарнд шатад хагсв.
Келхд, зуни халун кемд көдлдг мана таңһчин улст Ар Үзгин захд бәәдг әмтнлә әдл орн-нутгин правительствин шиидврәр зәрм льгот өгхлә чик болхмн билә. Көдлдг әмтнә җалвин, медәтә улсин пенсин кемҗәг икдүләд, амрлһна өдрмүдиг утдулхла сән болх. Хальмг Таңһчин Улсин Хуралын (Парламентин) депутатнр, правительственн гешүд болн РФ-н Орн-нутгин Хүүвд болн Федерацин Советд Хальмг Таңһчиг элчлдг депутатнр болн сенатормуд эн төриг босхх зөвтә.
Тер хоорнд Хальмг Таңһчар МЧС-ин цергллт эн халун өдрмүдт учр угаһар һазаран бичә һартн, түүмрин әәмшг уга зокалыг күцәтн, эврә эрүл-мендән батрултн гиҗ цуг улсиг саглулҗана. Тана герт дегд ик халун бичә болтха гиһәд нарн босдг кемлә үүд-терз хойран секәд серү орултн.
Эн төрәр эмчнр бас маднла селвгүдәрн хувалцҗана. Теднә келсәр, һаң халунд күүнә толһа эргнә, чинән алдрна. Кемр халунас көлтә му болхла, бачм дөңгиг дуудулад, маңна деерән чиигтә кенчр тәвх кергтә. Халунла өдрин дуусн киитн ус үс хойриг уух кергтә , йир сәәнәр ундыг хәрүлнә. Эрүл-менд харлһна көдләчнрин сагллһар, халун өдрмүдлә әрк-чигә уудмн биш.

БЕМБИН Очр
Һаза дегд халун болҗана[img=left]

Видео