Бәәсн һазран кеерүлхәр шунна

15-07-2021, 14:32 | Таңһчин зәңгс » Зіњг

Хальмг Таңһчин Улсин Хуралын (Парламентин) сүл сүүрт таңһчин правительствин Ахлачин негдгч дарук-финансин министр Шурһчин Очрин темдглсәр, сүл җилмүдт әмтн бәәсн һазртан сән кец-таал тогталһна төсв күцәхәр эврә мөңгән немҗ шунмһаһар орлцдг болв. Тиигәд, 2019-ч җилд мана таңһчд зуг дөрвн районд бәәрн әмтн йисн төсв күцәлһнд орлцв. Ут тоодан 5 сай 300 миңһн арслң эн кергт олзлгдсмн. Үстин, Октябрьск, Яшкулин болн Ик Буурла райодт таңһчин болн райодын бюджетәс йилһгдсн мөңгнд бәәрн улс эврә мөңгән немҗ селәндән сән таал тогтав. Эднә седвәрәр бичкдүд нааддг болн спортивн талвңгуд тосхгдв, олн-әмтн сергмҗтәһәр амрхин төлә паркс секгдв.
– Бәәрн әмтн бийснь ямаран төсв күцәхиг шииднә. Теднә төсв күцәлһнд кергтә мөңгнә 80 процентинь таңһчин бюджет даана, 10 процентиг муниципальн бюджет йилһнә, наадк мөңгнь бюджетн биш болна. Төсв 1 сай арслңгас үлү болшго зөвтә. Таңһчин муниципальн бүрдәцс эн төсвд шунмһаһар орлцдгнь темдгтә. 2019-ч җилд 9 төсв, 2020-ч җилд болхла 18 төсв күцәгдв. Әмтн эврә седвәрәр бәәсн һазртан сән таал тогталһна төсв күцәв, дәәнә болн тууврин цагт әмнәсн хаһцсн нег һазра улсин санлд бумблвс босхв. Эн җил мана таңһчд әмтнә седвәрәр 25 төсв күцәгдхмн гиҗ зуралгдҗана, эн кергт 10,5 сай арслң йилһгдхмн, – гиҗ Очр Санджеевич келв.
Хальмг Таңһчин финансин министерств әмтн бюджетин мөңгиг олзллһнд орлцлһна кергиг бүрткҗ диглнә. Җил ирвәс мана таңһчд әмтнә седвәрәр күцәгдҗәдг төсвс икдҗәхнь бәәрн улс эврә селәһән эс гиҗ балһсан кеерүлхәр шунҗахиг иткүлҗәнә. Октябрьск район эн төсвд цугтаһаснь түрүлҗ орлцад, олнд үлгүр болҗахнь маһд уга. Одахн энд дәкәд һурвн төсв күцәгдв. Тиигәд, района цутхлң Ик Царң поселкд «Хутор сити» (зургт), Восход селәнд «Зергента» болн Иҗл селәнд «Байр» гидг бичкдүд нааддг талвңгуд тосхгдв. Зуни амрлһна кемд иим кец-таалта талвңгуд секгдснь селәдин бичкдүдт сән белг болв. Эн һурвн төсв күцәлһнд 2,1 сай арслң йилһгдсн билә, терүнәснь 1,4 сай арслң таңһчин бюджетәс һарһв.
Хотл Элст балһснд эн көтлвр бас күцәмҗтәһәр бәәдл-җирһлд тохрагдҗана. Шидр Элст балһсна Хургин Ахлач Орзан Николай болн депутат Цекира Зулта Горькийин нертә уульнцин 13-ч болн 35-ч тойгудта гермүдт бәәдг улсла харһв. Әмтн эднә гермүдин өөр сән таал тогталһна, шам углҗ тәвлһнә, хуучрсн сег шинрүллһнә төрмүд босхв. Бичкдүд нааддг талвң, спортар соньмсҗ цогц-махмудан батрулдг кергсл энд кергтә болҗана гиҗ әмтн ухан-тоолврарн хувалцв. Харһлтд орлцачнрт әмтнә седвәрәр ямр нег төсв күцәлһнд эдн бийснь мөңг немҗ ямр нег төсв күцәҗ болхин тускар цәәлһвр өггдв. Тегәд эн гермүдт бәәдг улс тиим көтлврт орлцхар шиидәд, бүрдәмҗин баг эн төриг күцәх болв. Эдн сән кец-таал тогталһна төсв күцәлһнд кергтә мөңгнә 10 процентынь бийснь даах зөвтә.
ЭГС-ин Ахлач Орзан Николайин келсәр, әмтн эврә седвәрәр ямр нег төсвд мөңг немдг эв-арһ делгрлт авчана. Хотл балһсна әмтн тиим төсв бәәдл-җирһлд тохралһнд шунмһаһар орлцҗана. Шидр бидн седвәрин төсвс күцәлһнә туск тогтавр батлвидн, тегәд седвәртә улс эднә герин эргндк һазр ямаран болхиг, ямаран бүрдәц тосхлтын көдлмшиг күцәхиг шииднә. Дәкәд эдн бийснь тосхлтын көдлмшин йовудыг бүрткх зөвтә. Балһсна һардвр седвәртә болн шунлтта улсин төсвс дөңнҗ, цуг халхин дөң күргхмн, – гиҗ Николай Павлович келв.

ДАВАН Наталья

Бәәсн һазран кеерүлхәр шунна

Видео