Хаалһсин ясвриг бүрткв

20-07-2021, 10:19 | Таңһчин зәңгс » Зіњг

Шидр Хальмг Таңһчин правительствин Ахлач Юрий Зайцев «Региональн болн бәәрн хаалһс» гидг төсвин медлд ясгдҗах хаалһс бүрткҗ хәләв. Элст-Арзгир-Минеральные Воды хаалһд күцәгдҗәх ясврин көдлмш, хотл балһснд Гоголин, Номинхановин, Островскийин нертә, Физкультурная, Бабушкинә переулкд, 6-ч проездд хату девскриг шинрүллһнә йовудыг премьер-министр одҗ хәләв.
«Әәмшг уга болн сән чинртә хаалһс» гидг келн-улсин төсвин медлд хотл балһснд 13 объектд ут тоодан 19,55 дууна хаалһ ясгдхмн. Өдгә цагт тосхлтын бүрдәцс 11 участкд ясврин көдлмш күцәҗәнә. Тер мет эн җил Шапшукован болн Манцын Кец нертә уульнцст хату девскртә хаалһс болн тротуар тосхгдхмн.
Таңһчин правительствин Ахлач хәләсн объектст вице-премьер Күүкән Нарнла болн таңһчин тосхлтын, көлгн-күчнә болн хаалһин эдл-ахун министр Җанҗин Викторла, Элст балһсна һардврин болн тосхлтын бүрдәцсин элчнрлә селвлцә давулв. Тосхгдҗах болн ясгдҗах объект болһнд олн зүсн төр учрна, тегәд цугинь учртан авч көдлмшиг күцәх кергтә гиҗ премьер-министр темдглв. Үлгүрнь, онц эздүдин гермүдин өөр һазр дорас усн һардг орм бәәнә, әмтн йовһар йовдг хаалһ тосхх һазрт модд урһна, шин хату девскр углҗ тәвхәс урдаснь усна сурвлҗ сольх кергтә. Тегәд тосхлтын бүрдәцс болн бүртклһнә органмуд учрсн төрмүдиг хамдан хаһлҗ, тосхлтын көдлмш батлгдсн зурала ирлцҗ күцәгдх зөвтә гиҗ таңһчин правительствин Ахлач даалһвр өгв.

Барт белдснь
ДООҖАН Наталья

Видео