Краснознаменскд – хальмг генералд бумб

22-07-2021, 16:53 | Таңһчин зәңгс » Зіњг

Давсн амрлһна өдрмүдт Калининградск мүҗин Краснознаменск балһснд Советск Союзин Герой, генерал-лейтенант Басан Бадьминович Городовиковд бумб секгдв. Давсн җилд эн балһснд төв талвңд олн-әмтнә генералын нерн зүүлһгдсн билә. Ода тер төвд бумб дүңгәҗ зогсҗана. Бумб секлһнә байрин керг-үүлдврт Хальмг Таңһчин делегац орлцв. Элст балһсна һардврин толһачин дарук Довгопола Дмитрий болн олна үүлдәч, нертә эмч Башанкан Бадм ончта керг-үүлдврт орлцҗ, таңһчин хотл балһсна «Мөңк һал» бумблвас атхм һазр күргв. Тер мет күндтә гиичнрин тоод бумб секлһнд Басан Бадьминовичин зе күүкнь Елена Николаевна Городовикова бас орлцв.
Басан Городовиков һардҗасн 184-ч йовһн цергә дивизь 1944-ч җилин намрар эн һазрт немшнриг дарад, Советск Союзин болн Пруссин хоорндк меҗәг һатлсмн. Калиниградск мүҗин Краснознаменск балһснд ик-бичкн уга Төрскән харсгч Алдр дәәнә цагт ямаран ик бәрлдән энд болсиг меднә, Советск Союзин Герой, генерал-лейтенант Басан Городовиковин һардҗ йовсн дивизин залу-зөрмг болн туурмҗта хаалһин тускар мартхш, сулдхачнрин санлыг әрүнәр хадһлна. Эн җил Калининградск мүҗ бүрдәгдснә 75 җилин өөн темдглгдҗәнә, тегәд эн бумб секгдснь хойр дам очнта йовдл болв. Эн балһснд Басан Бадьминовичин санл мөңкрүлҗ бумб тәвх седвәриг мана нег һазра күн Елисеев Сергей татсмн. Келхд, шидр эн Калининградск мүҗин һардврин Ахлачин негдгч дарукин үүлд батлгдв.
– Хальмг улсин тууҗд Басан Бадьминович Городовиковас ончта болн темдгтә кү олҗ авхд берк. Төрскән харсгч Алдр дәәнә җилмүдт залу-зөрмг кевәр дәәлдҗ йовсн генерал Хальмг Таңһчан тууврин җилмүдин хөөн босхҗ делгрүлҗ авсмн. Энүнә чадмг һардврт мана таңһч делгрҗ йовсмн. Ода энд олн келн-улс ни-негн сән-сәәхн бәәнә, – гиҗ Сергей Елисеев келв.
Хальмг Таңһчин делегацин ханьд ирсн күндтә гиичнр орн-нутгиннь тууҗиг, өвкнриннь залу-зөрмгиг әрүнәр хадһлҗ йовх бәәрн улст болн эн бумб тәвлһнә седвәр татсн төрскнч седклтә улст ханлтан өргв. Хальмгин хотл балһсна һардвр Элст болн Краснознаменск ах-дү балһсд болхин седвәр татв.
«Басан Бадьминович эндрк йовдл учрснд деерәс байрлҗах гиҗ би ицҗәнәв. Мини аав болн Иван Боваевич Мантаев энүнә тускар зуг буульмҗта үгмүд келсинь соңсҗ йовлав. Басан Городовиков хальмг һазрин туск, таңһчин босхмҗин болн делгрлтин туск төрмүдин туст чаңһ неквртә, дала үг уга, шүрүн күн билә гиҗ тедн келдмн. Алдр генералд, таңһчин һардачд, мана дурта Баатрт бумб секгдснь орта. Энд Басан Бадьминовичин нертә төв талвң бас бәәнә. Тегәд ода Хальмг Таңһчд төрҗ һарсн эс гиҗ өсәд-боссн күн болһнд Әрәсән нег захд эрк биш одх темдгтә орм бәәнә. Эн кергин эк татсн болн терүг бәәдл-җирһлд тохрасн цуг улст ханлтан өргҗәнәв, эднәр бахмҗ кеҗәнәв», – гиҗ Башанкан Бадм ухан-тоолврарн хувалцҗ бичв.
Хальмг Таңһчин Толһач Хаска Бату эврәннь халхасн Калининградск мүҗин губернатор Антон Андреевич Алихановд ханлтан өргв.

ДООҖАН Наталья

Краснознаменскд – хальмг генералд бумб

Видео