Анджаевихн – Әрәсәд сән гисн селәнә өрк-бүл

22-07-2021, 16:55 | Таңһчин зәңгс » Зіњг

Шидр «Җилин сән гисн өрк-бүл» гидг Цугәрәсән марһанд Хальмг Таңһчин нерн деерәс орлцсн өнр-өсклң Анджаевихнә өрк-бүл «Селән һазрт бәәдг өрк-бүл» гидг номинацд диилвр бәрснә туск байрта зәңг ирв. Михаил болн Валентина Анджаевихн Көтчнрә района Ергенинский селәнд бәәнә, эдн дөрвн үрән асрҗана.
Цугәрәсән марһанд эн җил ут тоодан 3 миңһн һар өрк-бүл орлцв. Тедн дундас 85 субъектәс 85 өрк-бүл дииләчнрин тоод орв. Эн марһанд олн үртә, селән һазрт бәәдг, тәв һар җилдән хамдан бәәдг, өвкнриннь авъяс хадһлдг өрк-бүлмүд йилһҗ авгдна. Цуһар эдн региональн марһанд диилвр бәрҗ, ямр нег номинацд орлцна. Анджаевихнә өрк-бүл таңһчин девсңд диилвр бәрәд, Цугәрәсән марһанд орлцх зөв авсн билә. Михаил болн Валентина хөр һар җилдән ни-негн, кен-негнәннь седкл медҗ, хөвтә-кишгтә җирһл эдлҗ бәәнә. Эдн дөрвн үртә, ууһн көвүнь – оютн, хойр күүкнь – сурһульчнр, отхн күүкнь ода чигн бичкн. Герин эзн селәнә эдл-ахуд көдлнә, авальнь селәнә сурһульд бичкдүдиг биилдг дасхна. Эднә өрк-бүл өвкнриннь авъяс-заңшал әрүнәр хадһлҗ, кен ахан күндлҗ, бичкнән өкәрлҗ бәәнә. Хадм экнь ачнран асрхд дөң болҗ, бердән медсән зааҗ өгнә. Бичкдүднь сурһулян сәәнәр сурна, спортар соньмсна, билг-эрдмән делгрүлҗ, олн зүсн марһаст орлцна. Эк-эцкнь дөрвн үрндән чик сурһмҗ өгхәр шунна.
«Җилин сән гисн өрк-бүл» гидг Цугәрәсән марһаг Әрәсән күч-көлснә министерств болн җирһлин күнд таалд туссн бичкдүдиг дөңндг Саң бүрдәҗ давулна. Марһанд диилвр бәрсн өрк-бүлмүдиг намртан субъектд йөрәхмн, хөөннь эдн Цугәрәсән байрин хургт орлцхмн.
– Цугәрәсән марһанд диилвр бәрсн өрк-бүлмүдиг, хамгин түрүнд Анджаевихнә өрк-бүлиг цаһан седкләсн йөрәҗәнәв. Эн марһанд мана өрк-бүлмүд җил болһн диилвр бәрдгнь темдгтә болн байрта болна, – гиҗ таңһчин социальн делгрлтин, күч-көлснә болн көдлмшәр тетклһнә министр Өлзәтин Марина темдглв.

БАТАН Сәәхлә

Анджаевихн – Әрәсәд сән гисн селәнә өрк-бүл

Видео