Эврә улстан нөкд болхар зүткнә

05-08-2021, 12:41 | Таңһчин зәңгс » Зіњг

Селәнә ахлачин керг чилдмн биш. Эн олн үртә эцк кевтә эврәннь дааврт бәәдг улсин тускар ухалад, теднә төриг хаһлад, өдр-бүрин кергүдинь бүрдәһәд йовдмн.
Лаганя района Красинское селәнә ахлачар Татьяна Автушенко 2015-ч җиләс авн көдлҗәнә. Эн бәәрн күн, энд төрҗ босла.
Үүлдән орснас авн Татьяна Николаевна: цуг медрлән, чидлән, дамшлтан төрскн селәндән, эврәннь улстан нерәдәд тусан күргхәр зүткв. Энүнәс көлтә олн дунд ик тоомсрта. «Оңданар көдлҗ чаддгов, юңгад гихлә әмтн намаг эн үүлд суңһсмн, тегәд чигн би теднә итклиг хаңһаһад цуг арһ-чидлән төрскн селәнә делгрлтд тусханав», - гиҗ Татьяна Николаевна келнә.
Красинское селәнә дунд сурһульд 40 һар күн багшлҗана. Дунд сурһульд зуунас һар сурһульч сурчана. Школыг арвн җилин туршт Минән Сергә һардҗана. Красинское селәнә дунд сурһуль кесгәс нааран тогтсн авъясар нүүрт йовна. Түүнә сурһульчнр җил болһн сурһулин, билг-эрдмин, спортын халхар райондан болн таңһчдан ончрад, түрүн орм эзлнә.
Бичкдүдин садт 50 көвүн-күүкн асргдна. Бүрдәцин һардачар Увшин Анна көдлҗәнә. Келхд, селәнд садт орх чеерүд уга. Бичкдүд шимтә хотар текгднә.
Өдмг болһдг герт Светлана Сикунец болн Наталья Бондарева көдлнә. Сәләнә әмтнә келсәр, теднә болһсн өдмгнь йир әмтәхн. Лагань балһсна әмтн чигн Красинское селәнд болһдг өдмгт нег үлү дурта.
Бәәрн ФАП сән герт бәәршлҗәнә. Терүг толһалҗадг эмч района цутхлңгас ирнә, түүнә нөкд болхла бәәрн күүкд күн мөн. Селәнд поштыг Наталья Михина һардна.
Наадк улс Лагань балһснд көдлҗәнә. Тедн өрүһәр эврә ГАЗель машиһәр көдлмшүрн йовад, асхнднь хәрҗ ирнә.
Ямаран төрмүд бәәнә гихлә селәнә ахлач эврәннь «Цевр усн» гидг федеральн төсвд орҗ, селәнә улсиг әмтәхн усар теткх саната. Татьяна Николаевна кергтә цаасан цуглулад Лаганя РМО-д илгәчклә.
Красинское селән Лагань балһснас долан дуунад бәәнә. Селән балһсн хойрин хоорнд бәәдг хату девскртә хаалһин чинрнь му биш. Зуг селән дундаһур хаалһс йир му. Эн учрар Автушенко РМО-н хайгар бичг бичәд, селәнә хаалһсиг ясх кергтәһинь нексмн. Келхд, Лаганя РМО-н һардврин темдглсәр, Красинское селәнд бәәдг хаалһсиг ясхин төлә мөңгн йилһгдхмн гиҗ бәәрн улсиг байрлулв.
Дәкәд эн җилд СМО дунд сурһулин медлд бәәдг һазриг ахулад сәәхрүлсмн. Ода тенд әмтн амрхин төлә цуг таал бәәнә.
Күүндвриг ашлад, Татьяна Николаевна иигҗ келв: «Ода, юуһинь нуухв, күнд гем тархагдад, әмтнә ик зунь көдлмш уга бәәнә. Зәрмнь көдлмш хәәһәд оңдан регионмуд тал йовҗ одла. Мана селәнәс кирцхд зу һар күн күүнә һазрт йовна. Зуг, миниһәр, эрк биш сән цаг ирхмн. Мана таңһч делгрхмн. Әмтн эврә һазртан көдлмштә болхмн. Зуг күн болһн эврә көдлмшән сәәнәр үнн-чик седклтәһәр күцәх зөвтә».

ШААКУН Василий

Видео