Әмтнд тусан күргх седклтәһәр

07-08-2021, 15:13 | Таңһчин зәңгс » Зіњг

Өдр болһн һазаран һарад, эргндк бәәдлиг үзәд, дотран иигҗ саннав: « Яһтлан цевр-цер төгәлң, ямаран сәәхн цецгүд болн модд урһҗана». Мана гермүдин хашад эн ке-сәәхн бәәдлиг Үлмҗин Варвара тогтана.
Варвара Вячеславовна Краснодарск крайд һарсмн. Хальмг Таңһчд 1972-ч җиләс авн бәәнә. Тиигхд түүнә эгчнь Аһшин тосхлтын техникум төгсәһәд Элстүр көдлмшт йовулгдв. Тиигхлә баһ наста эрдмч баран болтха гиһәд Варвара дү дүүкән Кубаняс бий талан дуудсмн. Тер җилд Варя шиңкән 8-ч класс төгсәсн болдг. Элстүр ирәд Варвара автохаалһин техникумд орад сурһулян эклсмн, эгчнь болхла дасҗ авсн эрдмәрн көдлдг болв. Дарунь Варвара нег цөн җилмүдин туршарт Элстин поштд телефонист болҗ көдлҗәлә. Түүнәс күүкн Хахлына Тамаран нертә эмнлһнә училищд орад, сурһулян күцәмҗтәһәр чиләһәд, таңһчин наркологическ диспансерт медицинск эгч болад көдлсмн. Харм төрхд, хөөннь орн-нутг тарад, бүрдәцс хаагдад, әмтн көдлмш уга үлдәд, күчр-күнд цаг ирсмн. Тиигхлә 3 үртә Үлмҗин Варвара күүкдән асрхар олн җилмүдин туршарт йосндан муулян эдлсмн. 2014-ч җилд «Квартал» залврин компань секгдхлә, тиигәрән одад ода күртл тендән гермүдин хашас ахулад көдлҗәнә. Ода түүнә медлд олн давхр 4 гер орна. Варвара Вячеславовна өдр болһн эн гермүдин хаша ахулна, гермүд дотр бәәсн бәәриг сәврдәд уһана, һаза урһҗасн моддыг, цецгүдиг услна. Келхд, моддын ик зууһинь Варвара Вячеславовна бийнь суулһсмн.
5-6 җил хооран түүнә тәрсн модд темсәрн: альмн, кедмн, хар өрг, шар өрг, мадниг байрлулв.
Үлмҗин Варваран өөрән бәәсн әмтнд байр үүдәнә, төгәлңдән цевр-цер болн ке-сәәхн бәәдл тогтана. Мана гермүдин әмтн Варвара Вячеславовнад үнн седкләсн ханлтан өргнә.
Хаша ахуллһна көдлмш гиигн биш, юңгад гихлә ямаранчн теңгрин бәәдлд көдлх кергтә болна. Үвлин кемлә дала цасн орхла сән өдрмүдт чигн көдлмштән һарх кергтә. Зуг Үлмҗин Варвара икәр гейүрхш. «Би җилин эргцд өдр болһн серүн аһар киилнәв, эрүл-дорул бәәнәв, яһад гихлә көл-һарм көндрнә, өдр болһн әмтнлә харһҗ күүнднәв», – гиҗ эн инәнә.
ШААКУН Василий

Видео