Бәәдл ясрҗана

07-08-2021, 15:24 | Таңһчин зәңгс » Зіњг

Хальмг Таңһчин эрүл-менд харлһна министерствин зәңглсәр, сүл хонгт дәкәд 109 күүнд коронавирусн гем илдкгдв. Сүл өдрмүдт гемтсн улсин то невчк баһрҗана. Тиигәд, пандемий эклсн цагас авн мана таңһчд ут тоодан 25610 күн гемтв. Ода деерән таңһчин эмнлһст 832 күн эмнлһ авчана. Күнд кевәр гемнь давҗах 29 күүнәс 12-нь ИВЛ-аппаратд бәәнә. Эднә әм аврхин төлә эрүл-менд харлһна көдләчнр цугинь кеҗ, дөңгән күргҗәнә. Харм төрхд, эн әәмшгтә гемәс иштә 492 күн сәәһән хәәв.
Ода 8 района эмнлһнд госпиталь үүлдҗәнә. Тиигәд, Яшкулин эмнлһнд 66 күн, Приютна – 51, Көтчнрә – 43, Яшалтан – 49, Лаганя – 31, Октябрьск – 26, Ик Буурла – 21 болн Хар Һазра районд 13 күн эмнлһ авчана.
Коронавирусн гемәс хөрлһнә бачм штабин шиидврәр мана таңһчд хаслһна диг-даран ноха сарин 15 күртл зарлгдсн бәәнә. Болв әмтн саглуллһна некврмүд күцәлго олн зүсн нәр-наад давулҗ эн хальдврта гемәр гемтнә. Балһсна олна көлгнд әмтн чирәдән хааһул угаһар йовхнь үзгднә. Эннь бас гем түглһнд туслна.
Эн хальдврта гем цааранднь дарунь түгшгон төләд цуһар санитарн некврмүд эрк биш күцәх зөвтә. Олн-әмтн цуглрдг һазрт чирәдән хааһул өмсх, һаран эд-бод кех зөвтә. Эмчнрин тоолврар, коронавирусн гемәс саглуллһна тәрлһ кех кергтә. Тәрлһ авсн улс эн гемәр хальдсн цагтан гиигн кевәр гемннә, тегәд хуучта улст, медәтнрт нег үлү терүг кех кергтә. Хаврар нурһлҗ медәтнр тәрлһ авдг бәәсн болхла, ода баһ наста улс тәрлһ авчана.

КАРСАНА Евгения

Видео