Баахн өрк-бүлмүд шин бүүртә болх

24-08-2021, 14:51 | Таңһчин зәңгс » Зіњг

Баһ наста улс өрк-бүлән өндәлһсн цагт эврәннь гер-бүүртә болхар санна. Эн төр хаһллһнд «Әрәсән Федерацин иргнмүдиг сән таалта гер-бүүрәр болн коммунальн туслмҗар тетклһн» гидг шаңһа көтлвр туслна. 35 нас күрәд уга баахн улс терүнд орлцҗ, гер-бүүр хулдҗ авхин эс гиҗ тосххин төлә шаңһас демин мөңг авна. Эн көтлврт селән һазрт бәәдг баһчуд орлцҗ чадҗана.

Шидр Городовиковск болн Көтчнрә райодт баахн өрк-бүлмүд тиим сертификат авв. Городовиковск района муниципальн бүрдәцин толһач Абушина Валерий тавн өрк-бүлд гер-бүүр хулдҗ авлһнд демин мөңгнә сертификат бәрүлҗ өгв. Район эн көтлврт 2007 җиләс авн орлцҗана. Эн җилмүдин эргцд 48 баахн өрк-бүл сертификат авч, гер-бүүрин таалан ясрулв.
- Эндр тана өрк-бүлмүдин төлә байрта йовдл учрҗана. Тадн демин мөңгиг олзлҗ гер-бүүр хулдҗ авч чадҗанат. Өрк-бүлтн бат болтха, гертн бичкдүдин инәдәр дүүрч, хөвтә-кишгтә җирһл эдлҗ, ни-негн бәәтн. Эн көтлвр баахн өрк-бүлмүдт гер-бүүр хулдҗ авхд туслҗахнь темдгтә. Сүл цагт мана орн-нутгт нилхд төрлһиг урмдулҗах, бичкдүдиг асрҗах өрк-бүлмүдиг дөңнҗәх олн зүсн керг-үүлдвр күцәгдҗәнә. Бидн цааранднь чигн эн көтлврт орлцхвидн, – гиҗ Валерий Сергеевич йөрәлин үгдән келв.
Көтчнрә района муниципальн бүрдәцин толһач Һооҗрин Санл хойр өрк-бүлд социальн демин мөңгин сертификат бәрүлҗ өгв. Нарн болн Данара Каждаевихн, Мөңкә болн Байн Лиджиевихн удл уга шин бүүртә болхмн. Каждан Данаран келсәр, эднә өрк-бүлд хойр үрн өсчәнә. Эдн эк-эцкиннь герт ода бәәнә, тегәд эн мөңгиг олзлҗ эврә гер тосхх саната. Көвүн күүкн хойрнь салу эврә өрәтә болхд байрлҗана. «Бидн 2012 җилд эн көтлврт орлцхин төлә эрлһән орулсн биләвидн. Эн җилин чилгч күртл бидн субсидиг олзлх зөвтә болҗанавидн. Дәкәд маднд өрк-бүлин сертификат бәәнә, тегәд терүг бас олзлхар бәәнәвидн. Эн көтлврин некврәр бидн 72 дөрвлҗ метр гер-бүүр тосхх эс гиҗ хулдҗ авх зөвтәвидн. Авальм Көтчнр селәнд төрҗ һарсн күн болна, эн төрскн һазр-усндан эңкр, халуч седклтә күн, тегәд эрк биш энд герән тосхх күслтә. Баахн өрк-бүлмүдин төлә иим көтлвр бәәхнь йир сән, болв олн зүсн некврмүд күцәх кергтә. Тер бийнь шаңһас мөңг өгч, эврә гер-бүүртә болхд туслҗах көтлвр урмд өгнә», – гиҗ Данара бер хувалцв.
ДООҖАН Наталья

Видео